樂壇天后容祖兒於12月在紅館舉行的跨年演唱會，昨日宣布再添食3場，總數13場，打破其紅館騷的場數紀錄，心情靚爆的祖兒更公開一張性感「雪糕女郎」宣傳照贈興！
容祖兒的跨年個唱宣布再加三場，昨日她發布一張索爆「雪糕女郎」宣傳照。
容祖兒昨日為本月23日在廣州舉行的《容祖兒廣州MOOV Live》音樂會進行綵排，明顯心情靚絕，皆因她12月在紅館舉行的「ageas富通保險1314容祖兒演唱會」宣布加開至明年1月2-4日總數13場的個唱，打破上次紅館12場的紀錄。
師兄接受到
而祖兒在最新的宣傳照中，以火紅色性感內衣大騷美腿，更化身「雪糕女郎」坐在甜筒裏，非常誘惑。她自爆還有一款更性感的宣傳照，原本打算用作頭炮宣傳，但因太過性感，連自己都接受不來，問到是否挑戰底線？祖兒笑言：「真係好低o架！我接受唔到。（師兄劉浩龍接受到？）佢乜都接受到啦，（乜都睇過晒？）咩呀……人哋女仔嚟嘛！」
劉浩龍不介意祖兒性感示人。
祖兒昨日為演唱會綵排，心情靚絕。
撐樂壇未死
至於其好友黃偉文（Wyman）不滿香港作家李純恩批評現今作詞人，以及樂壇已死的文章引起大很回響，祖兒力撐Wyman說：「聽一首歌嘅歌詞、旋律，就釐訂行業『已死』，唔通專欄寫得唔好，我哋就話報界已死咁嚴重？佢（李純恩）係一個前輩，應該畀啲鼓勵，高抬貴手多啲，畀意見容易，因為唔使負責任，但聽者會敏感。」祖兒更抵死說：「如果話樂壇已死？咁我十幾場演唱會咪變咗神功戲，一定唔會o架嘛！」祖兒又撐Wyman愛這個行業才發表意見，未必對號入座。
另外，填國語歌詞為主的陳奐仁昨日出席錄影時，亦表示自己填詞時，不會犯邏輯上問題，所以李純恩要批評，就要列出多些例子，解釋邏輯和文法上的破綻，對於李純恩指填詞人是文盲，陳奐仁則言：「咁呢個邏輯上就有少少破綻，因為文盲就唔識填詞啦。」
from:
http://orientaldaily.on.c ... /00282_018.html
