杜德偉形容獲悉有B喜訊，如小時候父親送他一件期待已久的玩具般興奮。
年屆54歲的杜德偉（Alex）與細他24年的老婆李曉冰（Ice）結婚3年，昨日宣佈造人成功，太太已有喜5個月，更一索得男陀B仔預產期在10月出世。他接受雜誌訪問時透露想4年抱3，而太太更想生夠6個。
本報昨致電Alex問到首次做爸爸的心情，他說：「我自己無論心態、體能、身體都係比較遲熟嘅，所以喺𠵱家呢個年紀，有小朋友啱啱好。無論各方面都覺得自己好健康，好多精力，心態又成熟啦，可以對自己所做嘅一切負責任，變咗可以做一個好榜樣。」
Alex與太太Ice結婚三年來勤力造人，近月終嘗試計算排卵期方法「中獎」有B。
杜德偉笑言自己遲熟，依然好有精力健康，心態上已準備好做好爸爸。
資料圖片
冇妊娠不適
Alex透露BB好乖，老婆亦沒有妊娠不適：「佢冇話嘔呀，冇唔舒服，諗諗可能囝囝真係好乖，可能有跡可尋，我以前都係一個好乖、好靜嘅小朋友，我太太都係，好少畀到屋企好多嘅麻煩，又唔會湊我哋嘅時間踢曬腳咁。我細個嗰陣，媽咪都話陀我好舒服，基於呢啲DNA，令太太陀我哋嘅呢隻馬騮仔唔係話有好多唔舒服。」
成為準人父的Alex自言雖然沒有經驗，但會以父母為榜樣：「細個時爹哋媽咪都教得我哋兩兄弟好好，咁有好多細個時候嘅經驗，諗番童年過去好多回憶，最希望小朋友健康，有個快樂嘅童年，呢樣係我最想畀到小朋友嘅！」
採訪：皓騫
from:
http://hk.apple.nextmedia ... 160522/19622430
