夏雨喺近日重播嘅無綫劇《溏心風暴》度有幾個好乖好生性嘅仔女，不過現實中佢個仔竟然公開唱自己老竇。噚日有讀者報料，話夏雨個23歲嘅大仔黃俊銘（Dixon）喺Instagram狂數老竇污糟，佢話：「廚房啲食物唔雪臭晒冇所謂，因為你唔怕。飯盒你唔掉惹曱甴冇所謂，因為你唔理……」Dixon最後仲話：「我對𠵱個家無語了。」
夏雨知道個仔背後話佢之後一味話冇嘢。
噚日馮仁昭打電話問Dixon點解咁數老竇，佢話：「我同佢有啲小事喺度嘈，佢不嬲都幾污糟㗎啦，我唔係咁鍾意污糟邋遢！細個喺香港有工人執屋，之後移民去溫哥華同媽咪一齊住，一年幾前返嚟同爹哋一齊生活，要我handle晒啲嘢，我唔習慣佢嘅生活模式！」
夏雨：太耐冇一齊
𠵱家喺now TV做娛樂主播嘅Dixon話住西貢唔方便，想同老竇搬出市區，但老竇唔係咁想。不過，Dixon呻完之後好快就將留言刪除，佢話：「覺得唔係好啱，始終佢係我老竇，照顧咗我咁耐，又供書教學！」
對於Dixon咁數自己，夏雨噚日喺電話度哈哈大笑話：「完全冇事，大家太耐冇一齊，生活習慣有啲唔同箒！一個人到20幾歲一定係自己照顧自己，佢哋太習慣要人照顧，佢從來唔識自己執嘢！」
Dixon
Dixon日前喺Instagram狂呻老竇污糟唔執嘢。
from:
http://hk.apple.nextmedia ... 130826/18394389
