夏雨冇做TVB之後做咗一間喺新加坡上市嘅影視娛樂公司香港區執行董事，最近呢間公司搵咗趙雅芝囝囝黃愷傑主演一部以當兵為題材嘅電影《新兵正傳3：蛙人傳》，噚日喺九龍塘城市大學舉行交流會，導演梁智強都有到場。
夏雨透露稍後公司會有一連串計劃，包括明年7月投資一部5,000萬港元嘅電影，屆時會邀請一線巨星參演，例如劉德華、郭富城等。夏雨話自己都仲會拍戲，佢話：「都會拍，有啲傾緊。」
夏雨話喺《溏心風暴之家好月圓》做佢個仔嘅林峰
「開部《溏心風暴3》」
講到舊東家TVB目前狀況，夏雨即刻話：「𠵱家大地震，邊個揸fit都唔知，聽聞珍姐（曾勵珍）會唔會做顧問又唔知。」講到關菊英唔續約無線，夏雨話：「佢又走，司棋又走，我哋可以喺出面開部《溏心風暴3》，林峰自由身可以同英皇傾就得，係爭陳豪。不過相隔5年都要睇嚇演員狀態同公眾接唔接受。」
另外，今次《新兵正傳3》嘅主角黃愷傑喺戲中飾演衝動港男，佢話：「我都係港男，因為我喺香港出世，其實呢個角色同我本身嘅性格好唔同。」佢笑笑口話因為套戲喺新加坡拍，所以媽咪湯水欠奉。提到媽咪同爹哋黃錦燊都睇過首映，覺得佢有進步空間。導演梁智強話今次係陳欣健推薦黃愷傑拍戲。
撰文：馮仁昭
馮仁昭
from:
http://hk.apple.nextmedia ... 151104/19358640
