入行半年的廿三歲Now觀星台娛樂新聞主播黃俊銘，因為一單有賊入屋的新聞，無名小子上了港聞版，才被外界知悉他是甘草視帝夏雨的長子。沒想過見報的第一單新聞會是這樣，初嘗被記者在家門前守候的他，有點阿Q的說：「唔見咗部手提電話，買番都要五千蚊，朋友講笑話，當係用五千蚊响報紙賣個廣告，咁樣諗又幾抵喎！」
從小醉心學跆拳道，黑帶三段的黃俊銘，這天示範赤腳踢板，有板有眼，他寄望將來做動作演員，更以謝霆鋒為目標。六月便廿四歲的Dixon(右起)，與媽媽(前無綫藝人)馬慧玲、十六歲的妹妹珮瑜、爸爸夏雨和廿二歲的弟弟Wilson，一家五口在加拿大的生活照。
上月初，夏雨位於西貢的寓所「雨房」，一週內兩度被賊人入屋爆竊，當時在屋內遇賊的Dixon，事後在家門前接受訪問。（《蘋果日報》圖片）
表演慾
兩歲便移民加拿大的黃俊銘（Dixon），在溫哥華修讀傳理系畢業後，曾在當地銀行打工一年半，因為坐唔定的性格，去年初辭工返港，一心要入行，「細個完全無諗過會入行，到中學參加話劇和跆拳比賽，發覺自己好有表演慾，好想人哋目光注意我，尤其聽到掌聲，好有滿足感。」
父親是視帝夏雨，近年加入王維基旗下的香港電視，但Dixon沒有靠父親的關係入埋同一間公司，反而去了Now台，「自己想做這行，爸爸都有俾意見，但都係靠自己去面試。」加入Now台做娛樂新聞主播，連實習至今只有短短五個月，同事上下無乜人知他是夏雨之子，直至家居被打劫新聞後才人人皆知。
回想當日抗賊的過程，他說事後才知驚，「有一個賊响我房度摷嘢嘈醒我，嗰刻諗都冇諗就起身追出去，本來捉到一個，另一個就衝過來推我，事後諗番自己唔應該咁做，好危險。」
抗賊示範
Dixon示範跆拳道的自衞術，即使被人從後箍頸自己都能甩身。將對手的重心拉前，用腳從後踢低對方。
即使對手難纏，拉低對方一邊身，快速向對方批踭，令對手無還手機會。
跆拳高手
原本想入樂壇的他，當了娛樂主播後，得知做歌手唔容易，就改朝動作演員方向發展。
幸好他五、六歲便學跆拳，有兩下功夫傍身，Dixon有跆拳道黑帶三段資格，在加拿大時曾開班教人，「嗰時有時間咪教吓人，學生年紀都有大有細，最大一個係一位六十歲伯伯，見到佢哋比賽攞獎，仲開心過自己攞。」
他曾因中文太差，被爸爸由加拿大帶回港，由小二讀到中二，之後才返回加拿大繼續升學，「爸爸覺得中國人唔可以唔識中文，依家我嘅中文唔算好好，但起碼識睇識寫，唔係滿口英文，反而細佬同細妹習慣講英文，就快同爸爸溝通唔到，哈哈！」
說起六十六歲的爸爸，Dixon坦言有點敬畏，畢竟成長時，爸爸經常做太空人回港工作，父子的相處時間始終不及媽媽多，「當然同阿媽會好傾啲，但同爸爸有無代溝？又唔算係，爸爸有時講起佢以前細個經歷，唔係我聽唔明，只係我感受唔到。」
兩父子曾為家中小事有拗撬，當時剛回港的Dixon，因為不習慣香港天氣太熱，連開廿四小時冷氣機而被爸爸鬧，「大家嗌咗兩句，事後我睇番張電費單，嘩！又真係幾貴，不過我哋屋企有乜拗撬，過咗一晚，第日就無事。」
學獨立
Dixon從來沒有看爸爸主演的劇集，直至《溏心風暴之家好月圓》才改變，「細個有次睇爸爸一套劇，唔明點解爸爸咁慘，好心翳，之後無再睇佢嘅劇。直至佢攞視帝，睇番佢部《溏心》，有一幕講佢盲咗過馬路，自己唔知點解，不期然咁喊咗出來，我同佢講番，爸爸話證明佢做得成功囉。」
自從他回港工作，家中只有他和爸爸生活，兩人因為工作關係，傾訴話題也多了，有時他還跟爸爸去內地登台，「爸爸會同我事後檢討，話我好生硬，依家我做主播，爸爸得閒就會開電視睇，佢話我太緊張，仲教我對住鏡頭要笑多啲。」
現時夏雨經常到內地工作，家中便只剩他一人，短暫的自由生活係年輕人都會嚮往，但Dixon卻例外，他說：「媽咪同細佬妹仍留在加拿大，一個人在屋企無啖好食，自己又唔識煮，成日去七仔叮嘢食，我返來時腰圍係三十五到依家得番三十腰，以前唔識阿媽好，依家就好恨食住家飯，尤其係媽咪整嘅豉油雞。」
Dixon曾因為工作被人鬧，又試過訪問藝人時，搞錯資料而問錯題目，爸爸會跟他講，「碰吓釘先會進步。」成為娛樂主播後，Dixon首個訪問的對象是惠英紅，日前再遇，對方才知他是夏雨的兒子。
Dixon自小移民加拿大，兩父子溝通不足，近年二人才多了話題。由細到大，三兄妹的感情要好，今年暑假弟弟便大學畢業，Dixon（左）會回加國觀禮。
