新人顏卓靈近日有唔少拍戲機會，除咗同蔡瀚億（Baby John）孭飛拍港產片《狂舞派》外，之前佢都有份喺《迷離夜》演女鬼，表現都幾搶鏡。顏卓靈前晚喺Instagram貼《迷離夜》戲院滿座嘅相打氣，但就無喇喇惹嚟前RoadShow主持、嫁咗畀林忠豪堂弟林忠澤做少奶奶嘅梁慧恩（Viann）狂寸。
Viann留言：「你好煩呀，成日影住啲House賣咗幾多，未見過啲artist係咁。」顏卓靈嘅fans鬧Viann又睇又鬧，佢反擊：「Post得出嚟好壞都可以評論，你（指fans）大陸落嚟？」
顏卓靈喺《狂舞派》入面孭重飛飾演阿花，套戲票房同口碑都唔錯。劇照
當事人懶理留言
有人形容Viann係過氣主持，Viann即晒命話冇做RoadShow好耐，𠵱家正職係跨國能源管理公司嘅管理層，亦喺中大讀緊博士。Viann仲若有所指：「你又知你偶像份人唔衰格，我就知喇，兩年前已經識佢喇……唔知道顏小姐之前對我做過啲乜嘢嘅人就收聲。」
杜汶澤今次出手爆粗鬧梁慧恩撐顏卓靈。
已經嫁入豪門嘅梁慧恩，暗示同顏卓靈有恩怨。
一向支持港產片嘅杜汶澤都睇唔過眼爆粗寸Viann：「唔抵得咪咪X睇囉……冇見你幾年，個人變得咁衰格……唔抵得人就鬧人，冇X用。我個名叫杜汶澤，識唔識？你係咪讀書讀X到儍咗？」Viann不甘示弱粗口回敬阿澤：「比起你，我的而且確係冇X用，你最有X用。」雖然fans及阿澤為自己跟Viann開拖，但係顏卓靈一直未有留言，噚日仲同Baby John到商台接受鄭裕玲嘅訪問。
顏卓靈前晚喺Instagram貼咗戲院滿座相，竟惹嚟梁慧恩狂轟。互聯網圖片
顏卓靈（中）喺《迷離夜》同陳慧琳（左）、梁家輝合作。劇照
馮仁昭噚日終於喺電話聯絡到顏卓靈，問到佢同Viann係咪之前已經識？佢唔想多講咁話：「私人事唔想講，尊重言論自由，好似討論區咁有人鍾意有人唔鍾意，不過希望留言係多啲正能量。」
from:
http://hk.apple.nextmedia.com/entertainment/art/20130816/18380586
