現年45歲嘅陳浩民今年將做第二任老竇，佢嘅27歲內地老婆蔣麗莎（Lisa）幫佢生咗個囡囡陳雅薷之後，又幫佢陀住個囝囝，加起嚟可以湊成個好字。因為蔣麗莎決定喺香港生，所以呢位單非孕婦要經常中、港兩地飛。前日6點幾Lisa同埋媽咪帶住囡囡去咗銅鑼灣嘅city'super一齊行街買餸。
挺住大肚嘅Lisa帶住囡囡同媽咪去銅鑼灣行街。
買燒餅𠱁囡囡
戴住cap帽嘅Lisa預產期喺9月，所以個肚已經好似隨時生得咁大，佢推住架BB車同媽咪一齊喺超市入面買餸，臨盆在即嘅佢主要都係買一啲清淡嘅餸好似豆腐、蔬菜同瘦肉咁，其間囡囡扭計要外婆出手𠱁番。買完嘢後，Lisa仲買咗個燒餅𠱁囡囡，之後將袋餸寄存喺服務台，跟手就去咗睇化妝品同護膚品。前後喺地庫超市逗留接近半個鐘，買完嘢後三母女去咗時代廣場對開嘅的士站等車過海，撞正放工時間有成十幾人等車。呢個時候Lisa二話不說就企咗喺龍頭，原本排頭位嘅外籍人士已經眼望望，Lisa再次發揮來自老公嘅演藝本質，輕輕搓住肚博同情。冇耐有架的士嚟到，諗唔到一個就生嘅大肚婆動作可以咁快攝咗位開門上車走人，過程一氣呵成，令嗰位外籍人士望車興嘆。
來自強國嘅Lisa無視身後排隊等的士嘅人龍（右圖），交帶都冇聲就打尖上車。
Lisa買完餸就幫自己買護膚用品。
from:
http://hk.apple.nextmedia ... 130814/18377466
