唔知大家仲記唔記得，佘詩曼同多仔公陳浩民，曾經係過氣情侶呢，2002年拍攝電影《飄忽男女》而撻著，拍拖4年間亦曾多次傳出過婚訊，可惜最終都係分手收場。
近日佘詩曼同張智霖四出宣傳主演嘅新戲《十月初五的月光》，上個禮拜電影首映禮完咗之後，一眾演員齊齊去到一間日本餐廳為老闆蕭定一大搞生日party，現場超過100好友。昨日就有雜誌報導指喺生日派對上，阿佘同陳浩民撞到應一應，令二人分手9年後首度世紀同場。
報導指當晚同蕭定一份屬好友嘅陳浩民，帶住大肚老婆蔣麗莎到場，當時蔣麗莎自己坐埋一邊，陳浩民就同大台舊同事家燕姐吹水。咁啱呢個時候，阿佘亦都行過去想同家燕姐打招呼，真係飛機撞紙鳶，就係咁......呢對分手9年嘅過氣情侶就撞到應一應。
由於現場有好多人睇住，為免尷尬，轉數非常之咁快嘅阿佘即刻同舊愛陳浩民say hi，然後極速9秒9轉身走人，但陳浩民就當場呆咗兩秒先識反應。
事後雜誌都有致電陳浩民，問番當晚嘅情況，不過陳浩民嘅老婆蔣麗莎即時搶住護夫，就話自己同周家蔚同洪天明兩公婆嘅關係都好好，有時會齊齊帶住啲小朋友開party，阿佘有時都會嚟，但佢就坦言同阿佘冇乜兩句，佢哋之間亦都冇乜好傾，只係互相打過嚇招呼，仲話唔介意老公同阿佘拍過拖，因為已經係以前嘅事，非常之咁大方。
陳浩民其後都有講見番阿佘唔會尷尬，仲話：「我又冇對唔住人哋，人哋又冇對唔住我，何來尷尬呢？」
from:
http://hk.apple.nextmedia ... 151118/19377352
