崔建邦同唐詩詠兩個拍拖多年都經歷過唔少離離合合，之前佢兩個再次翻撻成功，估唔到早排又有報道指古天樂對唐詩詠有好感，古仔明知詩詠同崔建邦復合都照欽點詩詠做新片《逃出生天》女主角，仲話兩人喺戲中咀出真感情㖭，雖然古仔都話咗唔係事實唔回應，不過日前詩詠正印男友崔建邦回應事件時個反應就幾大吓，仲即時面黑扯火㖭！
崔建邦上星期五傍晚同唐詩詠喺西環撐枱腳，大熱天時佢寧願流晒汗踎街食飯都唔嘆冷氣，唔知係咪想宣示主權呢？
【熱到標汗】
【飲埋至走】
【埋單畀錢】
【翻撻成功】資料圖片
邊食邊抹汗
唔知崔建邦係咪覺得地位受到威脅，佢喺上星期五傍晚6點半左右帶埋詩詠去到西環一間泰國菜館撐枱腳食晚飯，當日詩詠薄施脂粉兼且戴上黑超，大熱天時下仲着住件外套。現場所見餐館內仲有唔少空位，不過崔建邦唔入去嘆冷氣，反而坐咗喺餐館門外嘅露天位開餐，唔知佢係咪想刻意同詩詠喺人前拍拖食飯宣示主權呢？
雖然當晚氣溫都過咗攝氏30度，佢兩個不時要邊食邊抹汗，但都好似樂在其中，一人一大碗仲加個大椰青，睇嚟胃口都幾好！佢哋大約食咗一個鐘左右，之後詩詠就先去街頭攞車，崔建邦就盡男友風度埋單，之後就去會合詩詠兩個結伴離去。
採訪：彭琮然、梁繼光
攝影：黃曉程、朱志聰
from:
http://hk.apple.nextmedia ... 130813/18375904
