無疑，吳卓羲（Ron）與Issac是密不可分。十年前，他在劇集《衝上雲霄》飾Issac彈起，劇中的他任性反叛、處事莽撞草率，激到Sam哥嘔血，而現實的阿Ron則受緋聞困擾，一度影響事業。十年人事幾番新，《衝上雲霄II》的Issac脫胎換骨，懂人情世故，令Sam哥感安慰。巧合是阿Ron在娛圈經歷十年風雨，悟出了處世之道。也許，他會跟隨Issac的步伐，事業再上雲霄。
出道至今，吳卓羲一直獲無綫力捧，雖然星途未算一帆風順，但總算站穩一線之列。
第一輯《衝上雲霄》愛情三角錯，第二輯同樣感情錯亂，雖然上輯由胡杏兒飾演的Zoe與吳鎮宇飾演的唐亦琛修成正果，可惜最終Zoe因先天性心臟病去世，來到《衝上雲霄II》又有胡杏兒，今次化身較硬朗的夏晨，跟吳鎮宇細佬吳卓羲發展感情，難免令人覺得亂。
阿Ron對於劇中錯亂感情表示絕非同一女，他日前接受專訪時說：「成套劇只有四個角色同上輯有關，我、胡定欣、馬國明同吳鎮宇四個，其實劇入面胡杏兒喺機場做飛機維修所以會撞到，我第一眼見到佢嘅時候，我都以為自己撞鬼，之後因為想知點解會有個咁似我阿嫂嘅女仔，加上我好怕阿哥見到佢又諗起Zoe，所以劇入面我哋都會盡量唔好俾阿哥撞到佢，但久而久之了解之後對杏兒又有另一種感覺，起初都擔心阿哥會介意，但原來阿哥一向都唔介意，因為佢都覺得杏兒除咗樣似之外，其他完全唔似。」
要數吳卓羲最轟動緋聞，定非跟官恩娜的一段情莫屬，事件更令男方形象大受影響。
資料圖片
幾乎每次拍劇都惹緋聞，今次的幸運兒是傅嘉莉，不過吳卓羲強調兩人絕冇可能。
資料圖片
吳卓羲曾高調地愛內地女星張馨予，可惜兩人最終分手收場。
資料圖片
樂意拍咀戲
阿Ron表示今次總算有不同結局，至少他與杏兒有開心結局，問到兩人會否有大膽親熱戲？他坦言幸好親熱戲未有集中於自己身上，他說：「今次我都算好彩，呢方面交晒畀馬國明同張智霖，我同杏兒都只係點到即止，我個人唔會太抗拒親熱戲，但最好要配合劇集同有咁嘅需要，監製要我咀我咪咀囉！」
問到會否介意不及其他男演員有艷福？阿Ron笑言：「唔會喇！我都冇刻意要求，可能張智霖佢自己有親自向公司要求喇，呢樣我就唔知，劇入面張智霖成日換女，我係負責出面幫佢擺平感情糾紛，我同佢亦師亦友，總之佢叫到，我都要幫佢。」當問到現實中是否掉轉，經常找友人幫自己擺平？他即說：「冇人叫過我咁做，我亦都唔會叫人去做呢啲事，我比較親力親為。」
對於今年無綫劇集收視長期仆直，可曾擔心過《衝II》？阿Ron說：「我自己對今次收視好有信心，因為呢十年好多觀眾都問幾時開續集，而且近排又重播過第一輯，依然令觀眾有話題，講咗十年都仲有話題去講，加上吳鎮宇同張智霖又係收視保證，所以收視呢方面我唔擔心，呢啲就交畀佢哋負責。而且成套劇又有靚人靚景，去咗好多個地方拍攝，所以都會有信心，我個人今次嘅功能只係一個演員，我會抱樂觀態度。」
在《衝上雲霄》胡杏兒是吳卓羲大嫂，來到續集（右圖）卻變成女友，難免令人容易產生混淆。
劇照
劇照
謝絕傅嘉莉
近年甚少留港拍劇的阿Ron，大部份時間於內地拍劇搵真銀，不僅豬籠入水，還助他遠離緋聞，皆因入行以來緋聞多得令他喊驚，可惜今次一回港又出事，跟同劇演員傅嘉莉鬧緋聞，雖然女方大爆兩人發展中，但阿Ron坦言與對方沒可能，他說：「我同佢、杏兒喺劇入面係會有三角關係，戲入面佢係會鍾意我，但現實我就唔知，總之我同佢拍完之後都冇接觸過，只係見過一次，仲係一大班演員同工作人員喺公司食飯。」
對於傅嘉莉自稱發展中，阿Ron說：「我有問過佢呢件事，佢話係當日同佢做訪問嘅記者扭曲事實，佢話根本冇講過呢番說話。」雖然阿Ron入行十多年一直有緋聞，但他堅稱絕不會靠緋聞上位，認為演員靠實力才能令人刮目相看，故他亦一直朝這方向發展，絕不想自己的努力被緋聞毀於一旦。對於兩人的關係，他斬釘截鐵說：「我同佢以前冇拍拖，𠵱家冇拍拖，將來都唔會有可能拍拖。」
from:
http://hk.apple.nextmedia ... 130804/18362941
