梁洛施（Isabella）同小小超李澤楷生咗三個仔，兩人雖已和平分手，但Isabella依然生活無憂，佢近年多數留喺加拿大多倫多，專心幫李家湊仔。
日前小小超俾人影到喺多倫多嘅Ja Bistro餐廳同一個紅衣女子約會，相信佢係放假過去探仔。咁啱得咁蹺，前日下晝Isabella帶住對3歲孖仔去咗多倫多布羅爾街（Bloor Street）嘅名店街行街，惟獨唔見4歲嘅大仔李長治。
梁洛施喺多倫多拖住一對孖仔行街，孖仔嘅陸軍裝同面形似足小小超㖭。
同梳陸軍裝
雖然Isabella已經係三子之母，但身形保持得好好，戴住墨鏡拖住對着到一式一樣嘅大細孖。雖然見唔到孖仔嘅正面，但就見到佢哋唔只剪咗個同老竇小小超一樣嘅陸軍裝，連頭形都同老竇都一模一樣，再從商店櫥窗嘅倒影望到，兩兄弟嘅面形都係屬於李家出品，好鬼可愛。
近日盛傳Isabella想復出拍電影，仲喺微博放晒聲氣，有報道話佢復出之作會同一齊拍過電影《深海尋人》嘅導演徐克合作，徐克公司負責人施南生噚日接受電話訪問時話：「好希望，未落實。導演徐克一直好欣賞佢，有同佢講過如果將來復出要通知，但暫時未有劇本畀佢。」
小小超李澤楷日前被影到同個女伴喺多倫多餐廳用膳。資料圖片
梁洛施不時被網友拍到湊仔生活照。資料圖片
from:
http://hk.apple.nextmedia ... 130731/18356675
