無線ViuTV收視爭拗李澤楷反譏廣告商唔理

自ViuTV上月開台後展開新一輪電視大戰，大前日ViuTV公佈開台後首兩週的綜合收視，即包括大氣電波、電腦上網及手機App等跨平台總收視成績，其中第一集梁國雄跟曾鈺成的《跟住矛盾去旅行》，綜合收視率有10.6%，即約68.9萬觀眾捧場。無線集團行政總裁李寶安前日聲稱無線一向採用傳統收視數據，狂轟ViuTV起用「綜合收視」對無線不公平，又質疑ViuTV收視數據有「僭建」、取巧及誤導之嫌，對此ViuTV公關部王小姐昨表示：「冇回應。」

熱播中的韓劇《太陽的後裔》首集綜合收視有9.3%。電視圖片
無線有計MyTV

然而，無線其實自2013年8月開始，除大氣電波收視數據外，亦公佈了「跨平台總收視率」，即包括大氣電波、手機App及電腦等平台收視，當年無線還召開記者會，指隨著觀眾收睇電視習慣改變及新媒體普及化，所以增設跨平台收視報告。如今李寶安指ViuTV收視「僭建」，有自打嘴巴之嫌。撇開ViuTV收視報告不談，無線在ViuTV開台後收視連番插水，其中《晚間新聞》曾跌到單位數，下跌原因相信大家心中有數。

對於無線質疑ViuTV收視統計，李澤楷昨在電訊盈科股東會中表示，收視點只對短期有影響，長期廣告商則未必只看收視點，而是如何以最節省成本的方法推廣其產品及服務。

李澤楷昨在股東會表示，長期廣告商不會看收視點的。資料圖片
對於收視爭拗，資深電視劇監製鄧特希昨回應：「收視報告係應該與時並進，先至反映到實際情況。真係有觀眾透過電視機以外其他終端包括電腦、智能電話收睇，ViuTV認為都可以公佈，冇問題。幾年前TVB都有加埋MyTV公佈收視。如果TVB真係要同ViuTV比較收視，應該只係比較高清數碼的翡翠台，因為ViuTV只可以係數碼收睇，而TVB都仲有佔十幾點收視的模擬頻道。」

採訪：魯吉
from:http://hk.apple.nextmedia ... 160506/19599420

馬浚偉重返小學雞生活，節目令他重拾不少童年回憶。微博圖片

【ViuTV風雲】無綫近日就收視點數，咬實對家ViuTV唔放，不過ViuTV對數字遊戲一於少理，繼真人騷《G-1格鬥會》、《跟住矛盾去旅行》和《晚吹》成功製造熱話後，新一輪強勢節目亦等住出籠（詳見附表）。

《G-1格鬥會》將於本月15日播完，緊接21日播出的有馬浚偉及卓韻芝參與的《同2047特首上學去》。節目中，兩個70後重返小學，並要在學校寄宿一星期，二人要和其他同學仔一齊上堂、測驗及做功課，兼要定時定候沖涼和上床睡覺。

阿芝：過緊阿婆生活

對於在節目中要重過小學雞生活，44歲的馬浚偉與37歲卓韻芝都大呼過癮。身在美國的馬浚偉昨日在電話中回覆說：「拍呢個節目好多趣事好開心，因為真係跟足時間表返學，學校啲枱同凳都縮細晒，唯一冇變嘅，係我嘅數學依然咁差，分數、乘數同除數都唔識計，畀同學仔笑我，考試嗰陣仲唔及格。」至於卓韻芝亦回覆表示：「喺寄宿學校裏面，係要過住冇手提冇電腦嘅生活，晚晚9點上床，朝早6點幾就要起身，嗰個禮拜我直情係過緊我阿婆嘅生活，見班同學仔又要緊張學業成績又要參加課外活動，其實都幾辛苦。」

卓韻芝笑言要晚上9時上床，早上6時起床是顛覆自己多年來的生活。

電視圖片

蔡雪瑩和陳子豐主持的《歐遊全細界》，會帶觀眾遊覽歐洲多個小國。

唐紫睿（右）和鄧穎芝會在今晚的《G-1格鬥會》埋身肉搏。

除了《同》節目外，另一話題節目《慳啲啦！Honey》亦會在月尾緊接《跟住矛盾去旅行》上架。雖然《慳》節目沒有藝人明星作招徠，但以四對真情侶在十日內接受不同體能和耐力測試，挑戰情侶互信和默契，同樣有睇頭。

而另一個全新旅遊節目《歐遊全細界》，主持陳子豐和蔡雪瑩會帶觀眾去遊覽歐洲小國，但並非純介紹風景名勝，而是兩個主持每到一個國家，都會進行抽籤或比賽，以獲得窮遊或富遊的信封。富遊主持一日有300歐元，窮遊主持就只得10歐元，要維持一日生計，窮主持就要扭盡六壬想辦法賺錢。

至於是非多多的《G-1格鬥會》，今晚便會播出唐紫睿和鄧穎芝落場激戰，同樣兩戰兩勝的她們，雖然賽前均稱對方是好姊妹，但落場無父子，相信二人在比賽中將有一番激鬥。

採訪：王梓嫚
from:http://hk.apple.nextmedia ... 160507/19601262

阿旦（中）與黃奕晨（左）及岑樂怡前晚在ViuTV飯局中，開心大嘆紅雞蛋和酸薑。

【ViuTV風雲】
免費電視ViuTV前日開台剛滿1個月，台前幕後前晚在柴灣一間酒樓大搞「富貴彌月宴」，筵開十幾席，約有200位員工出席，包括ViuTV總經理魯庭暉、真人騷節目《SE7EN》主持陳子豐、駱振偉（Thor）、陳俞希（Hailey）、黃奕晨（Dixon）、岑樂怡（阿妹）和《G-1格鬥會》的格鬥女鄧洢玲（阿旦）等，配合台徽顏色，大家跟足藍色dress code打扮到場。

Hailey依足dress code穿了藍色花花裙出席。

ViuTV總經理魯庭暉前晚也有出席ViuTV滿月宴，還跟員工打成一片。

眾ViuTV年輕主持雖是新面孔，但他們都充滿活力。

派酸薑紅雞蛋

ViuTV開台1個月，自家製作節目贏盡口碑，收視大挫無綫，真人騷《跟住矛盾去旅行》開台日首播「曾鈺成VS梁國雄」，綜合收視率10.6%，突破雙位數字，約有68.9萬名觀眾收看，成績斐然，前晚席間台前幕後都表現振奮。

前晚滿月宴甚至依足傳統派酸薑和紅雞蛋，一班年輕藝人又逐枱敬酒，台前幕後打成一片，究竟場中誰玩得high爆？阿旦昨在電話中爆料：「大家情緒高漲，仲起哄玩咀嘴，有個幕後錫咗魯生（魯庭暉），魯生其實好玩得，佢仲瀟灑作狀用手抹一吓個嘴，玩得好開心。」Hailey也說：「去到先知有紅雞蛋食。」

採訪：楊定
from:http://hk.apple.nextmedia ... 160508/19602288