看過無綫劇《師父．明白了》的觀眾，或多或少會留意穿男裝的女捕快，看到許亦妮（Whitney）的另一面，易服的她可算洗了底。猶記得當日她心血來潮參選港姐，誰知即被翻舊賬，令她與緋聞畫上等號。今日她晉身娛樂圈，成為新一代性感尤物，為免散發的騷味再惹風波，她決意與男士保持距離。
許亦妮外表性感惹火，被封為新一代尤物絕不為過。今年才24歲的許亦妮，對未來躊躇滿志。
許亦妮日前接受本報專訪時，細述入行經過及心路歷程，原來當年身在英國留學的她，抱着隨遇而安的生活態度，計劃畢業後返港搵工作。突然一日，她看到香港小姐競選截止日就決定參選，一心以為在海外報名，即使未能入圍身份便不會曝光，結果從此改變命運，不但要面對被起底翻舊賬，參選時緋聞更日日新鮮，最後過五關斬六將，成為2011年香港小姐季軍及最上鏡小姐，一個絕地反彈後，給予許亦妮重生機會。
現年24歲的許亦妮為家中細女，還有3位家姐，可謂萬千寵愛集一身，但在家以外則獲男士呵護，曾經緋聞一籮籮。直至參選後成為無綫藝人，緋聞終於平息，似有刻意絕緣洗底。對於過往被指有13位緋聞男友，被封集郵港姐，許亦妮堅稱：「當時有人惡意中傷我！」現時她着重的是未來，還說：「我𠵱家都驚第日嫁唔出，個個都識得google，睇到都即刻卻步，真係以為我咁花心，換轉我都會咁諗，所以我𠵱家同男仔合照都會好避忌，唔好咁親暱，唔想再有任何緋聞。」入行前極有男性緣，但入行後難找理想對象，她笑說：「識來識去都係公司人，朋友都叫我去擴闊生活圈子，唔好等運到。」
貪靚、騷味源自內心，加上擁有35D惹火身材，許亦妮正好符合性感尤物稱號，不過她解釋：「喺外國讀書習慣貪靚，個個鬼妹仔都係咁，我父母都貪靚，阿爸照鏡仲多過我，唔好睇我外表好女人味，內裏都有男仔性格一面，我只會嗲我男朋友，戀愛時我會好投入，仲會親自下廚煮嘢畀男友食。」
準備學功夫增值
雖然戀愛大過天，但工作方面許亦妮亦把握機會，令觀眾留下深刻印象，早前在無綫劇《老表，你好嘢！》中，凸眼演繹巴辣港女，帶旺人氣，近日則在劇集《師父．明白了》中扮演穿男裝的女捕快，早前又不惜騷身材以比堅尼上陣搵錢。對她而言一切最難得是機會，畢竟在娛樂圈競爭激烈，想要突圍並非容易，許亦妮準備學功夫，看準時機出擊：「我夢想做間諜角色，有機會來到，都要話到畀人知我有呢個能力。」
服裝提供：Sinequanone
《師父．明白了》中，許亦妮扮演捕快。許亦妮在《老表，你好嘢！》中凸眼扮巴辣。
from:
http://hk.apple.nextmedia ... 130726/18349435
