森美前晚在灣仔伊館舉行棟篤笑「森美要滾」，商台CEO陳志雲整傷腰仍捧場。森美全場大講鹹濕笑話，難怪他禁止囝囝來看騷。
森美甫出場即笑說：「我認鹹濕，之前話我戀腳，咁我咪鍾意八爪魚。我細個有睇鹹漫畫，就係《叮噹》，因為佢成日露啷啷同睇靜宜沖涼。」接着他又笑特區政府鹹濕：「佢哋起戲曲中心個英文名，用戲曲國語拼音，搞到好似叫私處，咁啲人又喺嗰度出出入入。另外有日我去旺角公園見到個阿伯，佢食錯屎話雀仔街不如叫『鵰×里bird bird lane』，阿叔話住近旺角去『鵰×里』好易。」現場更播出內地色情按摩傳單，寫明兩個鐘有36式。
騷上森美除了講之外，他更表演雙手撐起自己。森美甫出場脫去有白熊頭的毛毛褸，再大講鹹濕話題。
森美又寸四失陳山聰：「佢勁過吳三桂，因為佢啲衫好貴，非職業性失聰都冇得賠畀佢。」下半場森美再出場問觀眾是否滿意，觀眾大叫值回票價，森美就再笑罪成的陳振聰：「你哋真係貪心，有個信天主嘅風水佬因貪心有乜下場呀？罰你哋坐12年。」
陳志雲腰骨有傷，因此要用枕頭墊着來坐。
圈中夫婦姓無能
森美以粗口諧音寸政府：「遊行43萬人但政府話只有6萬，真係好『乸西』，如果稅局係咁『乸西』就好啦。我唔想CY落台，希望佢上演藝畢業禮個舞台，咁學生先可以對佢掉『乸西』。」
森美再玩圈中夫婦：「張繼聰係姓無能，老婆出碟唔用佢個姓，千嬅又唔用，唱歌叫丁楊千嬅。Kelly（陳慧琳）大仔姓蝦，咁咪蝦陳慧琳。佢哋唔着緊老公姓乜咪係姓冷感，老公係姓無能，陳豪最叻，冇得唔跟佢姓，但變同姓戀。」事後訪問講到以諧音爆粗，森美笑言：「全部可以寫冇問題，不過因為有呢part唔會叫啲仔嚟。」
from:
http://hk.apple.nextmedia ... 130722/18343177
