呢排電視迷真係有排忙，事關除咗要追《衝上雲霄II》外，仲要追埋《星夢傳奇》。大前晚《星夢》錄第三集，超班嘅李璧琦俾人叮走，好多人都戥佢唔抵，而之前俾人叮走嘅張名雅同張景淳，表現其實都相當唔錯，冇得再比賽似乎好可惜。不過，聽聞無綫正計劃搞個復活戰，之前被叮走嘅都有翻生機會再入決賽。前日向無綫高層余詠珊求證時，佢話：「會做復活戰。個節目原定10集，𠵱家可能會加集數，幾多未知，而準決賽同決賽呢兩日會做直播。」余詠珊又話會做第二輯，但未決定係今年定明年。
對於復活戰，李璧琦噚日喺電話度話：「係咪真㗎！如果真係有……我真係想，因為我講過好想喺台上唱歌，真係可以再上台，唔知要準備幾多，要準備乜嘢，突然覺得呢個問題好複雜，不過，唔緊要喇！包尾都試過，已經衰到冇得再衰，有復活戰心態都唔同，可以豁出去，當係以歌會友。」
張景淳：係鼓舞
張景淳就話：「死咗都可以翻生，係一個非常大嘅鼓舞！幾多次我都會參加，呢個係自己一個夢想，我再參加就唔會死喺同一個方法之下，作為一個死過嘅人，咁戇居因為一啲問題而死，今次點都會避免晒之前嘅嘢。」張名雅知道有復活戰都好興奮，佢話：「如果有機會再上台梗係開心，第一次唱唔係咁好，有機會唱第二次，會盡量去享受多啲！」
大前晚只有鄭俊弘有得留低，李璧琦同埋梁烈唯都俾人叮走，好彩有復活戰俾佢哋博個翻生機會。
張景淳俾人覺得輸得唔抵，𠵱家佢有機會可以爭番啖氣。張名雅話好開心有第二次機會上台再比賽。
from:
http://hk.apple.nextmedia ... 130717/18336905
