無線雖然同四大唱片公司破冰，但有好多歌手仍然唔肯同無線簽歌手合約，所以冇機會去勁歌頒獎禮攞獎。久違嘅關淑怡舊年年尾同無線簽約，仲幫佢哋唱劇集主題曲，有傳佢今年同容祖兒爭女歌手獎。前晚佢哋一齊現身將軍澳電視廣播城參與《2013勁歌金曲優秀選第一回》，今年無線又改賽制，由三回變兩回，入選歌又由14首加到20首，入圍歌手包括鍾嘉欣、黃宗澤、鄭欣宜、許廷鏗等無線「御用歌星」，而以前四大嘅薛凱琪（Fiona）同謝安琪（Kay）因為轉咗唱片公司，終於再有歌入選《勁歌》，無線契仔林峰因要返內地拍劇缺席，但仍憑《Nice》入圍，再一次打破唔到冇獎嘅慣例。有份得獎嘅鄭融同Fiona都著得好性感，大騷事業線，鄭融話：「無線話今次係summer party，我著少布啲最乖。」
鄭融穿上deep V曬胸，喺《勁歌》搶曬風頭。薛凱琪再踏《勁歌》頒獎禮台，繼續大騷事業線。
祖兒關淑怡爭獎
祖兒前晚有兩個半獎成大贏家，但就冇機會參與台灣金曲頒禮獎，反而G.E.M.有份競逐歌後，祖兒酸溜溜話：「唔失望，呢樣要天時地利人和，人哋有我唔制咩？知自己放咗幾多時間喺國語碟。」問佢會唔會傚法G.E.M.同林宥嘉喺紅地毯上手拖手，佢話：「等佢（劉浩龍）角逐先，有咁機會又唔錯。」怕唔怕關淑怡呢位對手？祖兒話：「佢喺我心目中一直係最受歡迎女歌手。」
另有讀者話無線呃人，宣傳講明請到韓國組合EXO同埋SJ-M嘅Henry等表演，點知原來係播片，令粉絲好失望。《勁歌》監製麥鎮東噚日喺電話解釋：「佢哋7月1號嚟香港做騷，係專誠拍片。」
容祖兒雖在《勁歌》成大贏家，但就冇緣打入台灣金曲頒獎禮。關淑怡自從同無線簽咗歌手合約，即刻有歌入圍優秀選第一回。
from:
http://hk.apple.nextmedia.com/entertainment/art/20130708/18326221
