現年45歲的陳小春於7.1颱風下升呢做老竇，30歲的老婆應采兒剖腹誕下6磅「小春子」Jasper，前日由內地飛撲返港的小春趕及見證兒子出世，心情勁靚的他昨日親口公告喜訊，大讚兒子嘴仔似老婆、鼻似自己好靚仔，小春指父母親手抱子女最快慰：「畀自己*吓*吓幾過癮！」
陳小春於前年迎娶應采兒（丁丁）後，兩夫婦一直心急造人，前日丁丁於山頂港安醫院剖腹誕下小春子，母子平安，BB的英文名取名Jasper，跟爸爸Jordan同樣是J字，同樣是7月出世屬巨蟹座。從相中所見，Jasper的腳仔肥嘟嘟，十分可愛。丁丁的預產期本來是7月中，小春為迎接乖仔降臨，早已計劃好於預產期前完成工作，怎知小春子給父母驚喜，突然搶閘於7.1兼颱風高掛下出世，完全打亂了小春的計劃。
陳小春與應采兒前日升呢做父母，昨日於微博上載新照，與大家分享喜悅。
丁丁感動到落淚
前日仍身在天津為新歌《愛的相反》宣傳的小春，接獲老婆要生的消息後，緊張到立即丟下工作飛撲返港，再飛車去醫院直奔產房，幸而小春子乖巧等爸爸回來才出世，初為人父的小春感到又驚又喜，還不失鬼馬作風說：「7.1香港打風，唔通代表囝囝未來可以呼風喚雨。」而丁丁聽到寶貝仔的喊聲，即流下感動淚水！
Jasper的腳仔肥嘟嘟，十分可愛！小春早前趕拍MV，空出時間陪老婆。
小春昨日到醫院探老婆丁丁及兒子，開心到手舞足蹈。
連日已食西瓜清胎毒，兼催老公返港的丁丁，昨早在微博公告已為人母的喜訊：「2013年7月1號，我好像做了一場夢，到今天起來還覺得很不真實，Jasper:we love u so so much。」、「老天保佑！Jasper爸爸及時趕到醫院」並上載懷孕時跟老公和父母拍攝的相片，挺着巨肚的丁丁和小春齊齊啜奶嘴，甜蜜滿瀉！小春亦留言回應：「親愛的Jasper歡迎來的（到）這世界，辛苦媽媽，當然也要謝謝我這個爸爸囉！」
昨午2時許，掩不住笑容的小春在醫院接受訪問：「我當然有入產房，冇理由大肚婆入去，自己印印腳喺出面，過程都幾順利，BB差唔多六磅，佢（丁丁）又唔驚好堅強。」本身在天津的小春，幸趕及返港迎接囝囝出世，他說：「自己一落機即飛嚟醫院，落車即衝上三樓產房，咁啱等到一齊入去。」問初抱囝囝有甚麼感覺？小春大呻：「未抱住，因為BB某一部份要觀察，今日有重大改變，應該唔使喺箱，可以抱佢啦。」是否囝囝有黃疸要照燈？他說：「術語我唔知，總之好多BB都會做。」
揚言感動的小春，自爆有錫老婆答謝，還抱怨沒時間多陪兒子：「本來應該唔拍戲，同BB多啲接觸，等我多啲聞吓佢陣味，佢又聞吓我陣味，大家friend吓，點之唔得，7、8月要去天津拍戲，我同佢頂多仲有一頭半個月玩吓先撇。完成電影後真係唔接住，畀啲時間我*吓個仔先，我老婆咁辛苦生個仔出嚟，我*都未*過，你知唔知做爸爸感覺，雖然要搵食，但有個細路仔，仲要係自己親生BB，畀自己*吓*吓幾過癮，呢樣係作為父親母親嗰種快慰！」
小春、丁丁及丁丁父母拍攝搞笑照，齊齊歡迎新家庭成員。
叠毛不下於城城
問到囝囝似邊個？小春得戚地說：「嘴似老婆、鼻似我，仲有好多毛……係眉毛，頭髮都好叠毛，不下於郭富城（城城），手又長腳又長，當然靚仔，同我一樣巨蟹座，咁蹺佢搶閘出嚟係7月1日，每年都有人幫我哋放煙花。」跟住問記者是否7.1有煙花？興奮之情溢於言表。小春謂囝囝中文名會搵人改，現在是食人奶，問丁丁是否感動到喊？他大讚老婆：「佢好堅強，眼紅紅，學都學唔到，係女仔先受到同捱到。」
from:
http://hk.apple.nextmedia.com/entertainment/art/20130703/18320424
