喺微博向鏡頭做出致敬手勢，同搵人仔無關，同投共鳥都無關；同樣，向祖國反法西斯致敬後再同班兄弟去外國登台搵快錢，兩者同樣無衝突。好似係。
惠州政協陳小春，日前中共大閱兵，陳政協於微博貼致敬圖，還寫道:「七十年前還記得嗎？向所有在反法西斯戰爭中為民族解放而英勇奮戰過的，犧牲了的和倖存的前輩，致敬！」就有人問:「為一個『法西斯政權』慶祝反西斯戰爭勝利去致敬助興？」難答。
陳小春當然暫未有回應，因為佢忙於同一班古惑佬去咗美國登台賺美金。又搵人仔又勾結外國勢力，豬籠入水，難怪買完一層樓又一層，昨日有週刊報導指，陳小春最近更一擲七千萬，購入大埔逸瓏灣2期、3,800呎相連單位，4廳8房，睇曬成個吐露港，兼與賺人仔賺到笑嘅王祖藍做樓上樓下。
新居就只係有陳小春個名，太太應采兒就冇，不過咁，陳小春喺2012年，用2,916萬購入依家住緊嘅天賦海灣，寫埋老婆個名；去年陳小春已於逸瓏灣2期購入一個783萬單位，由應采兒持有。至於佢喺大埔康樂園持有多年嘅兩個單位，就已於舊年趁樓市熱高價沽出，賺近五百萬，多咗筆錢方便佢喺北京置業添。
依家嘅陳小春政協，喺大陸市場真係幾吃得開，去年有九成時間留喺大陸，拍咗四個劇三部戲。舊年兩公婆仲幫大陸深圳衛視拍強國版《極速前進》真人騷，咁就穩袋八百萬。兩公婆夾埋有過億物業喺手，唔知幾時回報祖國呢？
from:
http://hk.apple.nextmedia ... 150910/19289380
