有人喜歡用人唯親，有人喜歡以才用人。首次做監製的應采兒（丁丁）得樂視老闆信任投資二千萬元拍網劇《天才在左瘋子在右》，她直言從沒想過找老公陳小春擔當男主角，笑說：「柯有倫後生啲，仲打得。」原來丁丁在片場好有霸氣，男女主角柯有倫和鄧麗欣（Stephy）在丁丁嚴厲指導下，臨場加演打人、親吻戲，擦出好多火花。
撰文：嵐山
有內地「大水喉」射住的樂視（Letv），揚言每年會投資「一兩個億港元」開拍至少二至四部劇進軍香港市場。以4K畫質製作的網絡劇《天才在左瘋子在右》將於11月13日在樂視首播，應采兒早前與男女主角柯有倫和鄧麗欣在尖沙嘴接受本報訪問，透露已籌拍《天》劇第二季及電影版。丁丁表示對劇集質素好有信心，但不會考慮收視問題，有好作品自然有人欣賞。
應采兒日前帶老公陳小春一齊赴北京宣傳新劇。
在劇中要被開腦的Stephy，自言願為好劇本剃光頭。劇照
不甘做湊仔婆
32歲的應采兒於2010年嫁給陳小春後育有一子Jasper，但丁丁不甘做湊仔婆，獲賞識在《天》劇兼任監製和演員。有傳丁丁在片場經常鬧人，霸氣似足武則天，柯有倫口窒窒說：「我講唔出……呢啲係激勵啩。」丁丁瞪大眼望住柯有倫說：「你嘴唇喺度震喎。」Stephy解圍：「佢（丁丁）應該唔會再打你㗎嘞。」原來丁丁在拍攝時突然加插打戲，令柯有倫遍體鱗傷，他苦笑說：「本來唔使打，但因為佢係監製，所以大曬！其實都唔算恰，愛囉……母愛。」丁丁笑謂：「所以唔揀小春，佢（柯有倫）後生啲，仲打得。」
丁丁自爆原本自薦做Stephy的精神病人角色，與柯有倫配成一對，但被導演拒絕，她解釋：「我原本諗住慳番啲錢自己做，但導演話我同柯有倫唔襯，配埋都只會成野蠻女友。佢建議我做醫生，但我又覺得好悶，好似埋沒咗我天份，哈哈。」最終揀了Stephy飾演柯有倫未婚妻，並加了一場咀戲，Stephy說：「雖然個劇唔係愛情故事，但我得咗一個怪病，佢依然好愛我，所以唔介意加一個好溫暖嘅kiss。」
柯有倫在劇中要照顧患病的未婚妻鄧麗欣。
邀請群星客串
丁丁今次大打人情牌，邀請鄭希怡、謝天華、鍾麗緹等，還有幫過港視拍劇的秦沛、姜文傑、周俊偉、李璨琛等參演，他們對港產劇都充滿情意結，Stephy說：「今次全部都係香港團隊同香港演員，感覺好不一樣，開心啲同有歸屬感。」問可覺近年港劇質素下跌？丁丁不停搖頭狂笑，冇睇過無線劇？她說：「嚇？咁講啦，我好多內地朋友，不論紅與唔紅都有工作，但香港朋友好多想拍嘢，但表演空間有限，冇好平台，我都係想用另一種方式（網劇）去畀機會大家。」
此外，《天》劇眾演員日前赴北京宣傳，丁丁老公陳小春亦有現身支持，被問是否很怕應采兒，小春望住老婆儍笑說：「不怕，她不是女人。」丁丁補充說：「怕女人只是他劇中的角色而已。」
場地：金域假日酒店Hari's Bar
服裝：Stylegal（應采兒）、Chorox（鄧麗欣）、5cm of I.T（柯有倫）
【丁丁喪撩Stephy】
應采兒（丁丁）是否真的咁惡？口講無憑，睇幕後花絮片最實際。見丁丁在片場經常睩大雙眼「兇」人，但實情台前幕後都打成一片，玩得好開心。每次不用埋位，丁丁都會主動撩人玩，平時好斯文的鄧麗欣（Stephy）突然變得好跳脫，與丁丁跳叉腰舞后，再跟丁丁、趙碩之及姜麗文一齊在大風扇前不停chok（左圖），玩到癲！而表面好怕丁丁的柯有倫，又與丁丁和Stephy即場rap歌，令片場充滿歡笑聲。
from:
http://hk.apple.nextmedia ... 151030/19352847
