楊千嬅同老公丁子高早排先幫囝囝進諾（Torres）慶祝一歲生日，不過湊細路仔自然有開心，亦有唔開心，所謂「養兒一百歲，長憂九十九」，所以大前日Torres發燒，做媽咪嘅千嬅不知幾擔心，即刻捉咗囝囝去睇醫生，見個仔冇乜事兩公婆先至安心咋。
就算只係兩公婆食飯，千嬅前晚都搞花臣戴個貓耳仔頭箍出街。千嬅囝囝早兩日病，兩公婆趁囝囝好番前晚偷閒出嚟撐枱腳。
食完飯丁子高一馬當先行出嚟攞車。早前千嬅同丁子高幫囝囝進諾慶祝一歲生日。
笑住搭電梯
前晚接近9點，千嬅兩公婆趁Torres瞓咗，就偷空揸車去銅鑼灣開平道撐枱腳，兩公婆去到將架車放低畀代客泊車搞掂，千嬅一身黑衫黑背囊，佢仲童心大發戴咗一個有對貓耳仔嘅頭箍㖭，非常可愛。
當記者影相時，剛好有兩個途人行過俾閃光燈嚇咗一跳，千嬅笑笑口話：「睇吓你哋嚇親人嘞。」跟住佢保持大笑姑婆本色笑住搭電梯上樓。兩公婆餐晚飯食咗唔夠個半鐘就食完，可能佢哋都係唔放心擺低囝囝，離開嘅時候，丁子高一馬當先去攞車接埋千嬅走。
from:
http://hk.apple.nextmedia.com/entertainment/art/20130620/18304617
