估佢唔到「福布斯」 劉愷威鍊贏古天樂除咗嫁入豪門，做明星名人都係唔少人嘅終極夢想！嗱，大家依家未做到，睇住周三（24日）出爐嘅福布斯中國名人榜先囉。港人撐港星，劉華喺港星中排名最高，名列第3，郭富城排23，張學友排25，但另一天王黎明就無影。離咗婚，係時候努力啲嘞！估唔到嘅係，齋唱嘅陳奕迅都排第6，贏咗鋪鋪打得甘嘅宇宙最強甄子丹喎。又估唔到嘅係，上年先啱啱返內地拍劇嘅胡杏兒，竟然係唯一入圍100大嘅港產電視台花旦，贏晒早過佢北上𢱑銀嘅蔡少芬呀鄧萃雯呀同佘詩曼呀！
之不過，媽咪姐最最最估唔到，後天化身為古天樂、林峯混合體嘅劉愷威排第49，拍戲無停手嘅古天樂反而跟佢尾，排50咋！我知，劉生北上拍劇好耐，但佢能夠去到呢個位，講到尾都要多謝排第7嘅女友楊冪嘞！
全靠honey咋！（設計對白）38歲嘅劉愷威同26歲嘅楊冪，前年拍劇撻着，女方嘅人氣強勁，令劉喺國內嘅知名度大增！《蘋果日報》圖片
我個陳喬恩都排99㗎！（設計對白）
范冰冰排第一，威晒！睇番計分準則，原來除收入外，計埋網絡、報紙、雜誌同電視嘅曝光率，唔怪之得去奧斯卡party都透點嘅「國際范」贏晒咯。《路透社》圖片
