劉愷威同楊冪前年結婚，囡囡「小糯米」都就嚟滿兩歲喇，但係呢兩年就不斷傳出佢哋婚姻亮起紅燈，上月劉愷威同楊冪嘅公司嘉行影視公司，就喺微博公開律師信，表明對近日網上流傳劉愷威同楊冪夫婦惡意不實嘅傳言，好似話有某明星夫離婚出軌等傳言，作出嚴正聲明，表明會對造謠者追究法律責任。
當大家以為律師信可以杜絕再傳出佢離婚嘅消息，昨日劉愷威同楊冪又再「被」離婚。今次傳出消息嘅係大陸金融界人士，佢哋喺微信(WeChat)嘅的金融界群組裏，有人聲稱：「楊冪有個公司要掛牌，券商盡調(盡職調查)肯定已離婚了」。而劉愷威同楊冪嘅嘉行影視公司就回應道：「我們已經回應過多次了，一切以律師函為準，對於發佈報道這些不實消息的人士和媒體，我們會追究法律責任。很感謝大家關心他們，希望了解事情真相，不要再助推這種不負責任的傳謠。」
據了解，楊冪嘅公司「嘉行傳媒」，之前曾傳出借殼新三板(指高科技企業)上市。年初，有財經媒體報道，去年底「嘉行傳媒」借殼「西安同大」登陸新三板，楊冪方面以低價（每股1.7元(人民幣‧下同)）參與定增及協議轉讓，控制「西安同大」，再以高價（每股77.95元）增發，引入戰略投資者，將幾千萬資產滾成上億以上。簡單嚟講，即係玩財技。
劉愷威同楊冪嘅離婚消息曝光後，就有唔少網民覺得事情並唔簡單，話楊冪套新劇《翻譯官》就嚟上映，所以先又傳出佢離婚消息，似乎有幫劇集宣傳之嫌。此外，日前劉愷威嘅老竇劉丹就話，囝囝同新抱楊冪會係父親節回港，一家團聚慶祝父親節，仲話慶祝節目由劉愷威話晒㖭！
from:
http://hk.apple.nextmedia ... 160520/19620366
