萬綺雯（蚊蚊）同張繼聰呢排忙緊拍無綫新劇《食為奴》，但呢頭落大雨，轉個頭又出太陽，影響咗拍劇進度，搞到開工時間又長兼要趕進度，好彩蚊蚊、張繼聰同成個劇組都好齊心。
日前有場戲喺電視城拍，講八阿哥阿聰喺兵荒馬亂嘅情況下搵蚊蚊，叫佢有乜依郁就要帶埋啲孤兒走，點知撞到刺客，阿聰為救蚊蚊而受重傷，鏡頭前見佢哋兩個好深情對望，仲一take過搞掂，但一停機兩個就忍唔住笑唔停，蚊蚊仲扯住阿聰條辮嚟玩，蚊蚊話：「之前已經度好晒，加埋導演好玩，所以日日開工好開心。」蚊蚊仲話遲啲佢同黃智賢、阿聰嘅感情戲好沉重，所以大家都話不如拍咗啲開心戲先。
雖然趕工，但蚊蚊同張繼聰開工玩得鬼咁開心。
母性大發
蚊蚊開工時同啲小朋友一齊拍，就算拍完都同班小朋友一齊玩，佢見到因為地下太濕而跣親嘅小妹妹，母性大發即刻走去睇下有冇事，跟住又抱又呵𠱁番佢，好快就𠱁番個小妹妹，蚊蚊仲讚班小朋友交到戲，難怪喺鏡頭後小朋友見到蚊蚊，就好似變咗樹熊咁攬到實一實，蚊蚊仲話：「我覺得自己好幸運，套套戲合作啲人都好好，大人有大人好玩，細路有細路好玩！」咁開心，睇怕蚊蚊有排喺無綫開工。
蚊蚊見到小妹妹跣親，即刻飛撲去呵番。
結婚多年冇細路嘅蚊蚊，抱住個嘟嘴妹妹幫佢抹眼淚。
搞笑了得嘅張繼聰，今次要認真咁打，都似模似樣喎。
from:
http://hk.apple.nextmedia ... 130425/18239130
