無綫《勁歌金曲》自81年開始面世至今，一直喺黃金時間播，都係以歌手唱歌、玩吓遊戲做主題，但嚟緊星期六（後日）起《勁歌》進行大改革，除改由鄭丹瑞（阿旦）做主持、以清談形式為主外，最破格係改咗喺周六晚深夜12點15分播。咁夜播，究竟有冇人睇㗎？
由鄭丹瑞主持嘅凌晨《勁歌》，究竟會唔會再爆收視新低？阿旦噚日同謝安琪、林欣彤、鍾嘉欣等歌手一齊拜神，相信大家都望《勁歌》有得繼續做。
唔理收視
其實N年前《勁歌》一度因收視不濟幾乎腰斬，近幾年無綫同四大唱片公司因版權傾唔掂數，搞到冇乜歌手上節目，集集都係嗰班歌手或者係自己藝員而為人詬病，勢估唔到同四大好番，《勁歌》逃唔過調去深夜播映呢個下場。
噚日鄭丹瑞同高層陳家揚、監製麥鎮東、謝安琪等歌手喺電視城出席拜神儀式，講到咁夜至播，阿旦力撐話：「以我老婆同朋友嚟講係越夜越美麗，呢個時間最啱去完街返嚟睇。」冇收視壓力？阿旦話冇包袱，收視留畀無綫理。節目形式改以清談為主，阿旦話會同啲音樂人傾吓對音樂睇法，仲講笑話都想搵傳不和嘅甄妮同鄧紫棋上節目傾吓。
另外，謝安琪（Kay）首新歌《最好的時刻》變咗撐佔領中環行動嘅歌，Kay話創作嗰陣唔係為某一件事，佢話：「係為咗馬丁路德金改善歧視不公，宣揚愛同和平，都可以配合唔同需要、個人選擇。」
from:
http://hk.apple.nextmedia.com/entertainment/art/20130418/18231535
