盧海鵬同賈思樂N年前喺無綫《歡樂今宵》裏面嘅短劇《蝦仔爹哋》深入民心，前排仲搞過舞台劇大受歡迎，而鵬哥近年主力拍電影，好少喺電視機度見到佢扮鬼扮馬嘅精采演出，雖然佢前排幫王維基嘅香港電視拍咗兩部劇，但因為政府拖咗好耐都未發新免費電視牌照，套劇幾時有得睇真係冇人知。
最近鵬哥應承咗有線娛樂平台拍十三集半小時嘅短劇《掃毒大家庭》，鵬哥飾演一個好鍾意做實驗嘅搞鬼爸爸，同做護士嘅囡囡唐寧透過輕鬆戲劇形式講解吓生活健康常識，仲會好似《蝦仔爹哋》咁搞笑演繹，不過就變成「蝦女爹哋」囉。其實同鵬哥一樣，唐寧都有幫香港電視拍劇，而佢哋今次喺有線嘅演出，就好快喺六月有得睇。
鵬哥同唐寧做父女，一齊用搞笑短劇嘅方式講解生活健康常識。《蝦仔爹哋》深入民心，鵬哥喺有線節目《掃毒大家庭》繼續放笑彈。
唔會返無綫
問到係咪將《蝦仔爹哋》個短劇形式搬去有線做？鵬哥噚日喺電話度話唔知用乜嘢形式，做乜都冇所謂，講到鵬哥拍勻晒咁多個電視台，佢笑話：「哈哈，叫到咪幫佢哋拍囉！」咁無綫搵到，又會唔會返去拍？鵬哥話：「無綫唔會搵我返去啦，就算搵我都唔拍，我唔會再拍劇，香港電視都係之前應承落嘅，唔想太辛苦，今次有線因為係短劇至例外會拍。」不過鵬哥𠵱家都幫港台拍緊劇，但唔知到時廣播處長會唔會安排咗喺亞視播喎。
from:
http://hk.apple.nextmedia.com/entertainment/art/20130411/18223723
