喜愛夜蒲嘅林德信（Alex），前晚又出動去中環尋開心，不過呢晚佢唔係偷約女友松岡李那，而係約咗一男兩女飲嘢。前晚11點，佢哋現身荷李活道嘅Quinary酒吧，唔知係咪冇松岡喺身邊依偎送吻，Alex成晚悶悶不樂，經常頭耷耷玩手機，似乎得番個軀殼喺度，靈魂飛咗去搵女友。
雖然同行嘅長髮女友人坐喺身邊，不停主動出擊撩傾偈，可惜Alex好鬼冷淡，得閒先搭兩句嗲，繼續專心玩手機，唔知係咪掛住同松岡傳短訊呢？佢哋喺酒吧坐咗一粒鐘就轉場，四個人朝卑利街方向行，沿途長髮女再發功黐住Alex慢行，好有心機陪佢解悶，但Alex請佢食檸檬居多，睇嚟就算松岡唔喺身邊，都唔使怕男友曳曳。
街邊試酒吹水
經過酒吧時，Alex仲撇低友人，企喺門口同侍應吹水，又試飲咗兩杯酒，三位朋友企喺街邊等到發呆，惟有先行入夜場Peel Fresco Music Lounge，Alex同侍應足足吹水20分鐘，先肯再會合友人。玩到半夜差唔多三點，Alex單拖離開時發現記者，仲好禮貌打招呼㖭！
另外，Alex前晚出席「饑饉三十」活動時，赤腳倒立做熱身，對於松岡隊友田代麻衣等人夜蒲攬仔，問到會唔會禁止松岡咁做？Alex話：「我啲朋友應該識照顧自己，唔識呷醋，不過如果女友同人貼面坐大腿就唔得喇！」
from:
http://hk.apple.nextmedia.com/entertainment/art/20130408/18220219
