台灣藝人、現年30歲嘅宥勝早前俾人影到幫38歲生日嘅徐若瑄（Vivian）慶生，仲同佢嘅家人一齊食晚飯而爆出緋聞。大前日佢哋又一齊喺台北華山藝文特區拍電影《72小時莎到你》，雖然佢哋前後腳入咗一間餐廳換衫，不過換完衫之後，兩個人開始傾偈。就算埋位拍攝嘅時候，徐若瑄不停對住宥勝搔首弄姿，而宥勝睇嚟非常受落，仲靠住個櫃員機猛chok型樣，兩個人鬥放電，睇怕佢哋話冇過電都冇人信啦。
愛玩姊弟戀
徐若瑄同宥勝通電嘅緋聞，開始於男方事業低潮期，當時宥勝唔單止首次發行嘅唱片令唱片公司蝕錢，佢嘅劇集反應又差，有傳佢為此匿喺屋企喊。喺呢段時間Vivian同宥勝邂逅，仲交換咗電話，可能女方主動出擊，喺女追男隔張紙嘅情況下，佢兩個好快就發展姊弟戀。Vivian仲落手落腳喺自己主演嘅電影《72小時》裏面，極力推薦宥勝演出，令到佢哋可以有更多相對嘅機會。
事實上宥勝已經唔係第一次玩姊弟戀，佢同32歲嘅隋棠合作拍《犀利人妻》嘅時候，都曾經傳過緋聞。不過宥勝嘅經紀人話宥勝同Vivian只係普通朋友，亦都冇同隋棠交往過喎。
from:
http://hk.apple.nextmedia ... 130330/18211452
