早排關淑怡開演唱會，口口聲聲話要戒煙保聲，不過食咗廿幾年煙嘅佢要搣甩壞習慣，唔係齋噏就得。前幾日，媽咪姐喺中環碼頭見到關淑怡等船返愉景灣屋企。
當時佢連扯兩支煙，邊扯煙邊眉頭緊皺，心事重重咁樣。都係嗰句啦，吸煙危害健康，而且減唔到壓㗎。倒不如放輕鬆啲，你要做個仔嘅好榜樣先得㗎！
佢煙駁煙連扯兩支，吞雲吐霧懶理旁人。莫講話冇公德，咩明星形象都冇晒。關淑怡喺碼頭買完煙，急急腳搵地方頂煙癮。
今年2月開過騷嘅關淑怡，喺後台被影得戙高腳食煙，煙癮甚大。關淑怡之前開騷，葉德嫻已經贈咗佢幾句，叫佢為咗囝囝着想盡快戒煙。點知呢頭應承，嗰頭就密密煲，身教好緊要呀媽咪！
