愛情呢味嘢真係話唔埋，好似忙住拍《愛•回家》嘅朱慧敏同EO2成員Eddie大纜都扯唔埋，但佢哋居然拍咗拖成年半。即使途中Eddie身邊出現過唔少浪蝶，但女方繼續對男方死心塌地，兩個打風都打唔甩咁款。
周一（18日），媽咪姐喺中環撞到佢哋拍拖，二人為咗朝聖有人龍王之稱嘅拉麵舖「豚王」，不惜踎街邊開餐。不過當日天氣悶熱，Eddie食到滿頭大汗，體貼嘅朱慧敏就立即拎紙巾幫男友抹汗抹嘴，場面溫馨。
早前朱慧敏出席活動時只承認Eddie係老友，講真依家咩年代呀！拍拖就大大方方認咗佢啦。
今年32歲嘅朱慧敏經歷唔少情傷，家陣難得搵到個唔介意踎街開餐嘅男友，要諗吓嫁喇喎！
幫你抹汗
已經剃光頭嘅Eddie食拉麵食到啲汗滴咗喺碗湯度，搞到朱慧敏忍唔住要出手抹汗。
跟手朱慧敏仲主動幫Eddie抹嘴，唔知搭枱嗰兩位食客有冇反胃衝動呢？
甜品滋潤
其實一碗拉麵已經夠晒熱量，但可能有愛情滋潤嘅人零舍開胃，佢哋之後竟然再買缽仔糕當甜品。
