信男友冇劈腿，熊黛林：一睇就知係假

郭富城跟苟芸慧傳緋聞，熊黛林（Lynn）前晚帶了媽咪捧男友城城演唱會，宣示主權，城城則隔空傳情，高呼「I love you！」昨晚Lynn在中環出席時裝活動，表示信任男友不會嬲，又指兩人七年不癢，至於婚期，恨嫁的Lynn直言：「等緊我未來另一半開口」。

熊黛林和郭富城的戀情進入大直路，兩人甜蜜互相支持。Lynn前晚帶同媽咪高調去看郭富城演唱會，據知Lynn自己買飛捧男友場，睇足全場完騷才走。Lynn全晚表現興奮，當城城走近觀眾席握手時，坐得遠的Lynn即企身狂揮螢光棒，成功吸引男友注意，城城刻意停步望一望Lynn的方向，然後高聲向fans說：You are my only one及I love you，似藉機向Lynn示愛，兩人隔空傳情甜到漏。

Lynn昨晚向城城發出結婚的呼喚：「等緊我未來另一半開口！」

熊黛林前晚捧城城場，一時high爆狂揮手，一時睇到嘟嘟嘴。Lynn在活動上又變做金魚嘴。
Lynn昨晚在中環出席時裝騷，對於早前傳城城上苟芸慧香閨，她謂：「又嬲？咁咪好唔得閒，明眼人一睇就知係作啦。」她信任男友，更體貼城城開騷不會追問。提到城城當眾示愛，她即緊張說：「冇冇冇，邊有呀？揮手就有，佢唱歌咋。」問兩人有否七年之癢？她說：「我𠵱家唔癢喎，OKOK，佢都OK，乜都好好。」

近日跟城城傳緋聞的苟芸慧（左）昨晚踩場到紅館看城城個唱。
想結婚唔敢催
城城曾講過不想結婚，一直默默等待的Lynn說：「屋企人話女仔要堅持，有啲嘢唔可以開口講，我唔識催，𠵱家等緊我未來另一半開口。」
同場Moiselle太子爺陳栢熹（Harris）表示有探望過好友、賭王四房千金何超盈：「佢好正面，身心OK，康復咗！」
Harris指超盈因事件牽連甚廣，影響到家人，覺得不好意思。有指她因甩拖情緒失控而暴瘦，Harris說：「拍拖嘢就唔知，佢一向想自己瘦，但無奈體質易肥，成日減肥，又易肥又易瘦咁。」可會勸她戒吃減肥藥？他說：「佢又怕曬，跑步又怕有肌肉，好多藉口，係一個懶人。」
from:http://hk.apple.nextmedia.com/entertainment/art/20130320/18200782

舞台王者郭富城過往開騷，熊黛林（Lynn）必會現身撐場！前晚「城嫂」Lynn更自己買飛入場，欣賞城城的第二場個唱，雖然她的座位與城城有一大截距離，未能如去年上演「世紀一握」，不過城城亦非常識做，於萬多名粉絲前向Lynn高呼「I Love You」，冧爆的Lynn昨晚出席活動時即甜笑︰「收到！」

城城前晚獲女友及未來外母捧場，全晚施展渾身解數，又跳又唱。

天王郭富城與熊黛林的「富黛戀」發展六年多，近年感情愈見穩定，去年底城城生日更與女友飛馬爾代夫過二人世界慶祝。今年城城再於紅館舉行「郭富城舞臨盛宴世界巡迴演唱會2013香港站安哥篇」，Lynn一如以往去睇騷，更帶埋母親捧場，以宣示主權。

連環肉麻表白
前晚，Lynn與母親及助手等一行四人於開騷前去完洗手間便入場，據知，該四張門票由Lynn自掏荷包購買，雖然他們的座位與台前有一段距離，但Lynn依然睇得非常投入，企足全場猶如小fans，不時揮動螢光棒及拍照。獲女友及未來外母捧場，城城全晚心情大靚，表現風騷。

Lynn猶如小fans一樣，不停為城城拍照。

及至握手環節，原本城城準備離開Lynn所在的區域，但他突然回頭，並向着Lynn的方向揮手，旁邊的觀眾即時起哄！其後，城城繼續勁歌熱舞，更當着場內萬多名粉絲前，對Lynn出冧招隔空傳情，先說「You are my only one」，再肉麻說了一句「I Love You」，再望着Lynn唱《永遠愛不完》，台下的Lynn聽到如癡如醉，一副冧樣。連環出冧招的城城似乎未夠喉，叫fans留意自己寫的歌曲《脈搏》，乘機再向Lynn表白！

郭富城「舞臨盛宴世界巡迴演唱會2013香港站安哥篇」大獲好評。

離場時，Lynn被城城粉絲包圍。熊黛林認為碎花Tube Dress令人有浪漫感覺。

Lynn離場時，獲fans邀合照亦有求必應，而她的保母車原本泊在警方封鎖線外，亦同樣能駛進入紅館範圍，可見地位超然。

唔怕七年之癢
昨晚，Lynn與陳柏熹出席Moiselle專門店開幕酒會，對於城城示愛「I Love You」，她聞言即甜笑︰「邊有呀？冇冇冇，揮手就有，有唱歌囉，其他就冇。（個心收到？）大家都收到，佢對咁多人唱。」提到近日城城與苟芸慧傳緋聞，她坦言絕對信任城城︰「明眼人一睇就知係乜，佢好唔得閒，有時間都瞓啦，我點會喺佢咁忙時，問佢啲無聊嘢！（佢太多緋聞，叫佢避忌下？）好多o架？我淨係知我冇乜。」她直言與城城關係「一路都幾好」，笑言不擔心會「七年之癢」︰「會咩？我覺得唔癢，（驚佢癢？）OK，乜都好好。」
from:http://orientaldaily.on.cc/cnt/e ...0320/00282_001.html