曾幾何時，同老婆謝安琪拍住拖返大埔聖母無玷之心堂望彌撒嘅張繼聰，轉channel信咗「外星人教派」，自稱已經輪迴咗第二萬幾世，又識同自己靈魂溝通，仲話自己做過火星人！
唔使再背聖母經，張繼聰上個禮拜五（三月八日）同商天娥、組合農夫，一齊為無綫新節目《演嘢》進行拜神儀式，由佢做代表揸住幾支大香拜神，祈求開工大吉。
但前天主教徒張繼聰拜神始終唔在行，要人幫忙將支香插穩，雞手鴨腳。
當陳振聰唔種生基信耶穌，張繼聰都轉channel信外星人教派，仲做代表拜神上香，不過佢連插香都插唔穩，要切燒豬師傅幫佢。
信基督教嘅娥姐唔拜神，不過就喺度搞搞震，話陸永唔識燒冥鏹：「你識唔識燒㗎！燒到冇晒先放手呀！」
搞完陸永，娥姐走去搞燒豬，嚇到師傅跑返埋嚟，驚佢真係一刀斬落去。
