籃球比賽發生意外屬十常八九，張繼聰為慈善搏老命，打籃球打到咬親條脷流血不止，要去醫院縫5針，嚇親身在外地的老婆謝安琪！
張繼聰臨完場前慘遭對手撞到咬傷脷，先用紙巾止血。
歌手張繼聰、組合天堂鳥、陳偉成（Avis）、甲一球員劉子健等前晚出席慈善籃球比賽，落場大鬥球技。同場亦有一眾靚女撐場任嘉賓兼做啦啦隊，包括黃榕、趙碩之、何雁詩、新進女星陳瀅等，當中以黃榕谷胸露bra邊火辣取勝，成功吸睛。張繼聰受訪時，表示之前忙著拍劇，已有半年沒有跟隊友練波，他笑言：「今次係做慈善，都希望臨老做番啲大事！」但太太謝安琪（Kay）就因身在外地，而囝囝就早前出海玩時暈船浪，所以未能到場。
咬紙巾止血
張繼聰比賽期間非常落力，但臨完場前慘遭對手撞到，導致他咬傷舌頭，流血不止。完場咬著紙巾止血的他，用身體語言向記者示意。到凌晨時分，張繼聰於Instagram上載照片，透露到醫院縫了5針，並抵死留言：「今次證明其實咬脷自盡近乎冇可能，同埋條脷縫針，係幾High嘅！」昨日記者致電阿聰慰問傷勢，表示自己只能吃流質食物謂：「依家唔係幾講到嘢，老婆都幾擔心，不過都OK嘅！」而昨晚因傷未能再落場，只可在旁觀戰。
黃榕於場邊火辣吸睛。
為慈善受傷的張繼聰，最終成功捧盃。
另同場的Avis回應舊愛周秀娜的「舊鞋論」說：「我唔知佢有幾多舊鞋新鞋，唔會傷心，打場波出身汗做嚇善事就冇嘢！」提到剛分手的前度尹蓁晞（Yumi）暗寸他邊箍煲邊溝女，他解釋：「嗰個係我契妹，由細識到大，落雨行斜路拖住佢行好casual，把口生喺人度，人在做天在看！」
文：音樂組
From:
http://orientaldaily.on.c ... /00282_015.html
