一班TVB小生唔係北上，就係跳槽，唔夠人用點算好？唔驚，仲有型佬！繼吳鎮宇回巢拍《衝上雲霄II》，跟住吳啓華喺《On Call 36小時II》做新版「程至美」之外，張兆輝近排都瞓晒身去拍《神槍狙擊2013》㗎！
點瞓法？咪真係搏晒命去碌樓梯、「磨晒薑」咁碌地，終於……出事囉！周日（10日）輝哥拍一場爆破戲，點知俾玻璃碎彈中右耳，痛到差啲講唔到對白。「好彩我有番咁上下經驗，見到有玻璃碎彈埋嚟，即刻擰歪面避開！點知feel到右耳痛，原來耳骨位流晒血，要即時洗傷口。好彩皮外傷啫！第二日都有開工。」
不過努力係有回報嘅，張兆輝嘅瞓身演出，即刻引嚟同劇靚女海味周海媚同徐子珊揸手機狂影，抵晒啦！
輝哥將右耳珠出血嘅相放上微博，老婆鬼馬回應話佢有「福氣」呀！
周海媚同徐子珊見輝哥碌得咁投入，都忍唔住話要影相留念。都話工作認真嘅男人最吸引啦！
膠紙護手
輝哥喺隻手度黐膠紙，然後就可以瞓身碌樓梯。
街邊碌地碌完後巷，輝哥再喺街邊碌，無用替身㗎！
