46歲周海媚（海味）長期喺大陸拍劇拍戲，難得早排返無綫拍新劇《神槍狙擊》。前幾日，媽咪姐就喺宣傳活動上面見到佢，老實講，海味無論身形、樣貌絕對唔輸蝕俾後生廿年嘅徐子珊，神情同笑容仲有啲啲當年「小芙蓉」嘅影子㖭。
見到海味山長水遠返嚟香港，諗住佢會喺香港住幾日，點知見佢做完活動，即刻去咗附近寵物店兜個round，之後就直踩去機場上京，真係來去匆匆。媽咪姐問佢為乜咁趕？海味就話：「呢排都以內地為主，梗係賺人仔！人仔值錢嘛。嚟緊會拍內地劇同廣告，仲有兩部電影傾緊。」海味搵錢至上，再想見佢，睇怕要等無綫加人工至得啦！
雖然係中女之齡，不過海味的確keep得唔錯，拍埋後生一截嘅徐子珊身邊，絕對唔失禮。
海味喺寵物店同老闆打咗聲招呼，逗留唔夠五分鐘，就坐保母車直去機楊。
海味自己落手落腳搬行李入機場，再急急入閘。咁趕時間，唔知係咪想快啲返北京見細佢七年嘅男朋友仔呢！
