杜琪峯執導、古天樂、吳彥祖（Daniel）同高圓圓主演嘅《單身男女》前年上映時喺內地收過億票房，今年寰亞公司決定開拍續集，不過續集Daniel只係客串，而圓圓戲份都唔會好多，因為佢媽咪病咗，圓圓幾乎每日都要去醫院照顧媽咪，所以佢要求減少啲戲份。
等開工打電話
前晚有讀者報料話楊千嬅、周渝民（仔仔）喺西貢早禾坑碼頭拍戲，記者去到現場發現杜琪峯喺度，經了解後，原來係為《單身男女2》試戲，現場所見，千嬅同仔仔嘅戲份主要喺架遊艇上面拍，當上船時仔仔展現紳士風度出手扶千嬅，喺船上佢哋就排戲對吓台詞先。未開始拍時，千嬅坐喺船度打電話，睇怕佢都係掛住囝囝Torres，打電話問吓囝囝嘅情況。
楊千嬅同周渝民前晚喺西貢為《單身男女2》試戲，導演杜琪峯仲親身喺遊艇度教佢哋走位同走表情。
續集主線應該會落喺古仔同千嬅身上，故事會講為忘情去到北京任職嘅古仔，繼續四處留情，一日與舊情人高圓圓偶遇，又愛火重*，點知死性不改嘅古仔，繼續同其他女人糾纏不清，又激走圓圓，之後佢又重遇初戀情人千嬅，又想重新追求，搞到已經有愛人仔仔嘅千嬅，唔知點樣抉擇。
前晚喺西貢拍戲嘅千嬅好掛住囝囝Torres。
from:
http://hk.apple.nextmedia.com/entertainment/art/20130313/18193139
