星期一（四日），Eason陳奕迅幫老友車婉婉做清談節目錄影，有名你叫吹神，車婉婉set定題目，以「信任」作為訪問大方向，但都預咗Eason會離晒題。
未正式錄映，Eason先同記者吹水，提到早排佢攞到「音樂傑出表現男歌手獎」，而女歌手就係G.E.M，換言之，俾人話目中無人嘅G.E.M，成績已經同Eason睇齊。
講到呢件事，戴住近視眼鏡嚟嘅Eason，即場換副黑超先再答。「我再換副黑啲睇你唔到。」又話G.E.M喺佢面前冇耍大牌，事關對方根本耍唔起，之後兜大個圈話自己好乖，响呢個圈比G.E.M多經歷，又話對方未必係目中無人，因為佢自己都成日發雞盲，對身邊人同事都好疏忽喎！Eason口中G.E.M係咪大支嘢，冇答案！吹神語無倫次啫！
戴住眼鏡嚟，Eason換過副黑超，示範目中無人喎！
車婉婉做緊記者訪問，Eason埋嚟搞搞震，插嘴話會响節目中講之前激嬲徐濠縈，搞到老婆唔啋佢！呢排G.E.M好識賣口乖，當晚攞完女歌手獎，就話能夠同代Eason攞男歌手獎嘅謝霆鋒合照好開心，任何前輩都唔敢再得罪。
