無綫新劇《On Call36小時II》上個禮拜四（二月二十八日）拜神，一般劇集開鏡，無論係二十集小品抑或四十集長劇，拜神燒豬一千零一隻，但當日監製潘嘉德安排兩隻大燒豬拜神，馬國明、吳啟華一人一隻豬唔使爭，之後潘監製仲無厘頭安排兩個握手，馬明忍唔住大大聲話：「我哋（指佢同吳啟華）冇不和喎！」
馬國明、吳啟華兩位男一號一人一隻豬，之後監製潘嘉德仲叫佢哋握手，差在未飲埋杯和頭酒，難怪馬明要即刻澄清冇同吳啟華不和。
馬明冇講錯，呢排同佢疑似不和嘅目標人物只有崔建邦，事關有傳馬明暗撻唐詩詠，搞到崔建邦爆粗問候馬明。
躍升頭號筍盤，馬明忽然多咗緋聞亦多咗是非，今次劇中再同楊怡做一對，由情侶升呢成為夫婦，名花有主嘅楊怡，就話自己刀槍不入唔會同馬明搞埋，兜大個圈同男友羅仲謙派定心丸，更乘機大讚兩男都係城中筍盤。得！得！得！知你個謙謙係會食住碗雲吞麵等你嘅絕種好男人嘞！
楊怡平日同男友合照完全冇肢體動作，但當日見到謙謙攬住黃淑儀影相，楊怡居然主動走埋去繑住男友，呷醋？唔會啦！幫謙謙搶版位就差唔多！
拜神前，道具部同事幫吳啟華準備晒醫生必備用品，除咗聽筒，仲有水筆原子筆熒光筆工作證名牌，掛少一樣都唔俾佢埋位！
