被指與前妻石洋子翻撻的吳啟華，昨日否認並指現時沒固定女友。互聯網圖片
現年52歲的吳啟華跟31歲前妻石洋子離婚兩年，兩人育有7歲女兒吳熙兒，有報道指啟華難忘嫩妻舊情，不時到澳門賭場散心，於三個月前更的起心肝重新發動追求攻勢，終於成功翻撻嫩妻，早前兩人更孖趙碩之和周美欣到日本沖繩，玩足五日四夜愛火重燃。
昨日啟華接受本報電話訪問，否認跟前妻復合：「我同洋子關係其實一直好好，就算分開咁耐，冇反過面，佢始終係我個女嘅媽咪，我一直對佢好好，𠵱家當咗佢係親人，好似我大女咁，佢有唔開心都會嚟搵我傾偈，其實我一直有同佢出去玩，今次又唔係第一次，已經去過好多次，以後都會繼續去，有時會帶埋囡囡，有時會同其他朋友去。」
一拖三女去日本沖繩旅行的啟華，不怕女友呷醋。互聯網圖片
啟華直認與前妻關係好，有時更會帶囡囡一起去玩。資料圖片
「唔諗結婚」
啟華似乎見過鬼怕黑，視婚姻如墳墓，他坦言：「復合就應該冇乜可能，因為我唔想囉，實在太享受𠵱家單身嘅身份，我唔想返去俾老婆管住嘅階段，亦唔會諗住再結婚，女朋友可以，但結婚就唔好。」問到現在有否女朋友？啟華坦白說：「冇固定囉，亦唔想要固定，拍吓散拖囉。」
轉食散餐的啟華，被問到女友是否圈中人？他笑說：「梗係唔係啦，太麻煩啦圈中人。」一拖三跟前妻、趙碩之和周美欣去沖繩，不怕女友呷醋？啟華抵死說：「唔係固定女友，有乜權呷醋！」
採訪：皓騫
from:
http://hk.apple.nextmedia ... 160929/19784714
