現年29歲嘅大肚婆應采兒（丁丁）雖然陀住4個月陳小春嘅骨肉小春子，但依然照去行街買嘢，前日仲拎住CHANEL牛仔布袋，着住Giuseppe Zanotti七彩波鞋，同佢老友鄭希怡（Yumiko）去咗人多擠逼、成街都係自由行嘅銅鑼灣行街。
差啲撞親
前日下晝6點半左右，孕味十足嘅丁丁同Yumiko喺時代廣場地庫city'super買零食，Yumiko全程睇住大肚婆，驚有人撞到佢，唔使好耐佢哋就買咗一袋戰利品離開。之後佢哋上咗去地面嘅連卡佛睇化妝品，佢哋一邊睇一邊交流心得，仲不時細聲講大聲笑。
行到差不多7點幾丁丁佢哋向住食肆林立嘅耀華街方向行去，一馬當先嘅丁丁完全唔當自己大肚，仲冇跟過路指示過馬路，過到對面仲差啲俾班橫衝直撞嘅小學生撞到，好在佢避得快，事後丁丁都忍唔住同身後嘅Yumiko伸脷覺得好險。避過一劫之後兩個人上咗一間樓上餐廳開餐，食到8點半左右就離開。喺餐廳樓下記者就問返佢剛才差啲俾途人撞到驚唔驚，佢好豪氣話：「我驚你多啲。」跟住打畀司機開車嚟接番佢走。
應采兒喺銅鑼灣面對橫衝直撞嘅自由行同學生一啲都唔驚。
應采兒（左）同老友Yumiko去咗人多擠逼嘅銅鑼灣行街食飯。
from:
http://hk.apple.nextmedia ... 130223/18173916
