模特兒出身的傅嘉莉（Kelly），剛簽了無綫做親生女，即有份拍攝重頭劇《衝上雲霄II》。劇中與吳卓羲做情侶的她，近日有傳被吳生睇中，「有幸」成為其緋聞女友之一。
只得28歲的傅嘉莉，三年前以455萬購入太古城678呎兩房單位自住，現時其單位已升值至680萬。
嬌滴滴的傅嘉莉形象西化，但估唔到其家居滿布風水陣，就連在年青一輩家庭中幾乎絕迹的神壇和地主都一應俱全。「神婆」傅嘉莉表示：「我自細跟屋企人信佛，擺風水陣都係求個心安理得，亦都希望可以旺吓事業同財運囉！」
拍攝新劇《衝上雲霄II》時，傅嘉莉吳卓羲傳出緋聞，吳卓羲拍外景時更不避嫌幫女方抹汗。
在恐怖片《追兇》，傅嘉莉與影帝劉青雲有不少對手戲，令她獲益良多。風水師叮囑傅嘉莉要放條青色龍在廳中化戾氣，惟因拍劇分身乏術，惟有print張青色龍貼上牆中。
傅嘉莉打開家居大門，大廳一角的巨型神枱和地主，比家中任何家具更搶眼，再環顧屋內的書房，原來亦布滿了風水擺設，當中有水晶山、吸財貔貅、吸水大象及鎮病星的玉石等。「我信咗佛好多年啦，佢教嘅人生哲理幾啱聽。至於水晶、寶石嗰啲，我有朋友研究開，介紹俾我。其實擺喺度又冇壞嘅，都係求平安同催旺流年運。我本身信開嘅師傅，前排叫我擺條青色龍喺廳，話可以化戾氣，我拍劇冇時間買，惟有print一張貼喺牆度囉。（print有效嘅咩？）唔知㗎！頂住先啦！」
傅嘉莉的神枱上，有各種類型的佛像，仲會定時添香油，相當虔誠。這個玉石是傅嘉莉的朋友到日本旅行後所送的手信，粉色玉石可催旺桃花。
傅嘉莉信風水，聽到朋友說貔貅可增財運，即在神枱附近放了兩隻。
和諧之家
風水擺設多籮籮，但記者身處其中，望落卻出奇地融洽。其實傅嘉莉在這間屋花了不少心思，全屋無論牆紙、地板、燈飾，以至廁所牆磚，都是由她親自揀料設計。當中她最滿意是家中的仿木膠地板。「我成日周圍飛，見到酒店啲設計會影低做參考。至於用膠地板，係因為我拍凍，磚地板對我嚟講太冷冰冰。至於用木紋，係因為每一塊地板嘅條紋好unique（獨一無二），亦都有原始美，加多張綠色地氈，好似走咗入大自然一樣，好溫暖。而且我有養貓，佢哋有時會甩毛，呢啲地板較易打理。」
傅嘉莉在大廳裝了地主，她說：「以前同媽咪住嗰時，佢都有裝地主，話求個安心。所以我搬咗出嚟自己住之後都一直有裝。」
除了養貓，傅嘉莉亦養了兩隻名種龜，包括體形較大的哈米頓龜及外形的骰的印度鋸背龜，是唱歌老師所贈。由於魚缸太小，哈米頓龜不時撞到玻璃，發出嘭嘭聲，惹來貓咪的注意。
跟不少女性一樣，傅嘉莉都是鞋癡，收藏高踭鞋及boot過百對，要兩個8層鞋櫃先裝得晒。而她最愛的就是以下兩對Jimmy Choo高踭鞋。
鍾情大型屋苑
傅嘉莉雖然年紀細細，但她早於07年開始置業，今時今日已先後成為三次業主。其間除了現時所住的太古城，亦試過住沙田第一城。「大型屋苑成交多，價錢平穩，配套設施充足，太古城呢間屋仲有九成實用率，比起好多新樓，地方見使得多。就算唔用嚟住，做長線投資都好呀。加上呢度返電視城拍劇都好方便，不過因我本身雜物多，兩房真係唔夠擺，或者遲啲見好價我會換間大啲嘅。」雖然傅嘉莉年紀輕輕，但投資卻很有心得。
傅嘉莉在日本工作時，迷上攝影。她在家中亦擺放了多部舊式相機，包括手中的Polaroid sx-70 land camera。
傅嘉莉好環保，日前她開完生日會，不想浪費布置用的氣球，全帶回家放在睡房中，閒時欣賞一番。朋友知道傅嘉莉最愛Le Scure兔兔毛公仔，經常送給她，一儲三十多隻。可以晚晚陪她瞓，兩隻貓貓都沒有這個福份。
除了篤信佛學，傅嘉莉同樣熱愛畫畫，而且畫功不俗。
傅嘉莉的星級廁所，除有特大儲物櫃裝過百款護膚品，廁板還安裝了暖氣功能，在冬天如廁時不會感到冷冰冰。
傅嘉莉改動了睡房一角，變成衣帽間，將衫褲鞋襪大褸分門別類擺放，井然有序。
