有樣有身材又肯搏嘅梁政珏，近年演出機會越嚟越多。趁年廿八佢為靚車洗邋遢，寄望事業於蛇年勇往直前。唔少無綫舊將轉投魔童王維基嘅香港電視，不過梁政珏拒絕轉會：「我一心一意留喺TVB，就算話有女主角做都係咁話，我好感激TVB畀機會我，舊年媽咪病咗，好多謝公司體諒畀我停工去照顧媽咪，同埋公司真係畀咗好多機會我。」
梁政珏趁住年廿八為靚車洗邋遢，實行以行動應一應節。唔好睇梁政珏弱不禁風，佢好落力揸住水喉射住架車洗乾淨。
唔介意性感
梁政珏不時性感現身，怕唔怕被定型先？佢話：「點解要介意？呢啲可能都係好機會，好似《衝上雲霄2》咁，我同Chilam（張智霖）有激烈纏綿戲，其實拍之前好緊張，仲係開工第一場，大家偈都未傾過就拍床戲，我都好驚得罪自己偶像，因為我好鍾意袁詠儀。」
from:
http://hk.apple.nextmedia ... 130208/18159765
