無綫近來劇集收視麻麻，加上臨近暑假，唔怪得要催谷吓啲綜藝遊戲節目。最近無綫就拍緊新一輯《玩轉三周1/2》，上年嗰輯係叫啲藝員扮嘢，不過反應麻麻，所以今輯會玩番好似最近韓國大熱嘅《Running Man》分隊比賽，仲會以水上濕身嗰類為主，希望觀眾睇到都透心涼。
近日唔少藝員去咗迪士尼錄影《玩》，前日有汪明荃、鄧梓峰、李亞男同朱璇等等，不過當日落大雨搞到佢哋好狼狽。噚日就輪到兩大咪神高海寧（高Ling）同梁政珏，同埋王梓軒、古明華同陳煒等人拍攝，着住小背心、熱褲嘅高Ling同梁政珏喺灰熊山谷噴水屋大玩噴水濕身遊戲！
高海寧玩到透底兼甩假眼睫毛（小圖），難得佢都冇發難，呢啲咪專業囉！兩大咪神高海寧（右）同梁政珏手口並用，搞到濕晒。
（左起）古佬同溫家偉狂噴水，可憐高海寧係咁追住接。朱璇睇嚟好高興，果然夠晒投入。
分組鬥接水
現場兩位咪神同古佬及溫家偉（大隻仔）似係分成兩隊，兩位男士用水槍射向高Ling同梁政珏，兩女手口並用攞住杯仔鬥接得水多，高Ling擔住個杯搞到口水都流埋出嚟，又俾唔知古佬定大隻仔用水射正塊面，搞到佢啲假眼睫毛甩晒、妝又溶！全身濕透嘅梁政珏就隱約露出打底比堅尼，唔知啲fans見到會唔會心痛呢？
from:
http://hk.apple.nextmedia.com/entertainment/art/20130613/18294988
