現年45歲嘅陳小春同29歲嘅老婆應采兒（丁丁）造人成功，前日下晝4點幾，兩公婆約埋今年結婚嘅好友鄭希怡（Yumiko），齊齊去銅鑼灣維園花市行大運，懷胎4月嘅丁丁腰圓肚凸凸，比身形似一碌竹嘅Yumiko脹足一個碼。
影民主黨攤位
大肚婆丁丁去人多地方都冇戴口罩，只係換咗對厚底波鞋行街，反而小春就戴口罩現身，佢哋入到維園就俾人認出，好多途人爭相合照，丁丁同Yumiko邊行邊傾，小春好似鵪鶉咁喺後面護駕，期間小春俾民主黨諷刺特首嘅攤位吸引，仲攞手機影相擺上微博，似乎好關心社會。
小春行花市時全程殿後，好似鵪鶉咁跟實老婆。
見到民主黨反特首攤位，小春即刻用手機影相，真係關心社會。
之後小春又掛住睇揮春，兩女已經行咗去前面，小春要頭岳岳搵老婆，冇幾耐丁丁買咗個桔公仔，佢哋離開時行去天后等車，期間小春又自己行開睇波鞋，保母車嚟到之後，小春冇先照顧老婆上車，反而自己衝咗上司機隔籬位坐，真係唔夠細心囉！
採訪、攝影：陳辰、彭琮然、梁繼光
小春掛住睇揮春，連老婆行遠咗都唔知。大肚婆應采兒童心未泯，捧住桔仔一路行一路玩。
from:
http://hk.apple.nextmedia ... 130208/18159681
