萬綺雯由亞視過檔無綫，一開始便坐正做女一，頭炮《老表，你好嘢！》又大爆，人人讚四十二歲有四十二吋長腿的人妻又索又好戲，樂易玲更不惜出高價簽她做親生女。
成為監製心目中的搶手貨，敲門全是安排做女主角，令不少坐冷板櫈親生女，怨聲載道。與萬綺雯同期過檔的陳煒，卻被無綫當做拋波機器，兩位亞視前阿姐，待遇差天共地。難怪陳煒句句有骨：「始終佢（萬綺雯）老資格過我好多，佢八字頭（八九年）入行，起碼早我五、六年！」
半年拍兩劇
無綫新劇《老表，你好嘢！》帶來話題，頭十集最高收視有三十七點，成績理想，連帶同劇主角及配角都上晒位。
由亞視過檔無綫，頭炮孭飛做女主角就爆出的萬綺雯，八九年選完亞姐入亞視，一做廿二年，其間無綫多次挖角都唔成事，直至去年，萬綺雯終於與無綫簽了兩年兩部劇，還講明要做主角先考慮，結果用了半年時間，先後拍了《老表》及與苗僑偉合作的《好心作怪》，極速完成合約。
成為無綫新寵，公司監製搶住要。即將開拍的清裝劇《食為奴》，萬綺雯掃低一班當家花旦，包括陳法拉及鍾嘉欣再坐正，身價亦由原來兩萬蚊一集，加到三萬蚊，加薪幅度達五成。
「監製黃偉聲最初嘅構思係鍾嘉欣再搭林峯，但林峯扭計唔拍，嘉欣又話要放假返加拿大，監製知如果開聲要嘉欣縮短假期，提早返港開工，對方其實係會答應，但諗諗吓又決定搵蚊蚊（萬綺雯）好過，佢當頭起，又有觀眾緣。」劇組工作人員說。
下個月才開工拍劇，最近萬綺雯忙於跑宣傳活動，一有時間就陪老公陳十三（下圖）返工。
連做籌款節目，陳煒都要Bra Top上陣，拋波大跳肚皮舞。
搶姐仔飯碗
空降萬綺雯密密拍，但個別無綫花旦卻要坐冷板冇劇拍，「外勞」入侵，無啖好食。
被一班無綫親生女視如眼中釘，原本屬同門、一齊離開亞視娘家的陳煒，亦對萬綺雯相當眼紅。
陳煒較萬綺雯早三個月與無綫簽約，無綫搵上門，陳煒即時𦧲飯應，所以在價錢和待遇兩方面，與吊高嚟賣的萬綺雯都差一大截。簽約無綫後，陳煒曝光率雖然頻密，但只被安排做大配角，加上每次都要賣肉拋波，拍劇及上節目一律無例外，相對萬綺雯只須晒吓四十二吋長腿就收貨，無綫的確親疏有別。
《食為奴》已拍了節目巡禮，但主角面目全非，女主角「呂四娘」陳法拉同鍾嘉欣都冇得做。去年七月萬綺雯同陳煒在無綫做晒冷活動碰頭，兩人已開始無偈傾。
撞面唔招呼
「蚊蚊同煒哥喺亞視年代仲有偈傾，就算啱啱過無綫嗰排都有互通消息，交換情報。後來煒哥發覺無綫好大細超，見住蚊蚊套套劇拍一線小生做女主角，自己就做配角，個心點都有唔舒服，兩個仲開始疏遠。早排仲發展到喺化妝間撞口撞面，都唔打招呼，好似唔識咁。」知情者說。
問陳煒有否留意萬綺雯於《老表》的表現，她說：「有睇，佢做個社工都好到位吖。（佢一嚟就做主角，你就要做大配角，會唔會唔開心？）又唔太介意嘅，我都唔會去比較，始終佢老資格過我好多，佢八字頭入行，起碼早我五、六年！」
問到介唔介意同萬綺雯待遇差天共地，38歲陳煒明寸42歲萬綺雯老。之前在《法網狙擊》做配角都搏盡泳衣加床戲，但回響都唔及萬綺雯勁。
劇中萬綺雯露42吋長腿，就成功殺入屋。過檔頭炮《老表》就令萬綺雯彈出，連無綫都開到聲要簽她經理人合約。
禾稈冚珍珠
無綫過去從亞視挖走唔少人，成功例子包括關詠荷、張家輝，過檔後一炮即紅，做唔起的人板則有林韋辰、文頌嫻做代表。
掂
張家輝
轉投無綫後，在《天地豪情》中飾演反派角色，演技大受好評，之後在多部重頭劇擔正。
關詠荷
93年過檔無綫後一直受力捧，《陀槍師姐》、《醉打金枝》等全部有收視保證，是九十年代無綫當家花旦之一。
掂
江美儀
江美儀在亞視多年，事業都未見起色，09年簽約無綫後，短短三年，已參演了15部劇集。
掂
田蕊妮
06年投無綫，被視為實力派演員，由配角做起，去年在《衝呀！瘦身兵團》開始擔正做女主角。
苑瓊丹
出身亞視，95年過檔，在劇集《真情》中飾演「低B嫂」，成功入屋。
唔掂
文頌嫻
93年加入亞視，被捧為當家花旦，00年轉簽無綫，曾經演出過多部劇集，但成績未見突出。
唔掂
李綺雯
李綺雯「𡃁妹」，01年參加亞視女優選拔奪得冠軍入行，06年改簽約無綫後，演出的劇集全部是三、四線角色。
唔掂
林韋辰
憑《再見艷陽天》成為亞視「師奶殺手」，後來轉簽無綫，卻不獲力捧，只能在劇集中做二打六角色。
