陳慧琳（Kelly）前晚喺理工大學舉行新碟《Reflection》試聽會，有份參與新碟嘅孫耀威去撐場。成兩年冇出碟嘅Kelly話好期待，講到佢性感演繹MV，佢話老公有睇過，讚幾好聽同好睇，仲關心問佢有冇打底㖭，不過老公向來唔擔心佢做嘢。對於陳小春榮升做爸爸，Kelly話好恭喜佢，已有兩名寶貝仔嘅Kelly就話暫時要封一封肚先：「如果肯定係女就會試生，如果三個都係仔就頂唔順，人工受孕冇話保證一定女，而且喺香港唔合法。」
陳慧琳話暫時封肚，除非肯定係女先肯生
孫耀威恭喜舊愛應采兒（小圖）有喜之餘，都話自己要加把勁
讚女友好生養
至於孫耀威講到舊愛應采兒有喜，佢話：「恭喜佢，大家冇聯絡，不過有共同朋友，但好少講起，send短訊恭喜佢，祝佢哋三個肥肥白白，我都要加把勁，身邊好多朋友都結婚生仔，我呢方面邁進緊，會越嚟越近，但一定唔會有咗先結婚，幾時結呢就要等女友差唔多生唔出先，佢𠵱家仲好好生養。」唔知係咪孫耀威眼紅舊愛咁快做媽咪，佢唔執輸話唔擔心太遲生B，因為自己好健康，仲覺得生得越多越好㖭，至於係咪今年拉埋天窗，佢話真係結婚會講喎。
From:
http://hk.apple.nextmedia.com/entertainment/art/20130130/18150537
