孫耀威日前接受專訪時透露早前開餐廳及酒吧蝕了近千萬，但仍很樂觀，並相信自己的眼光。攝影：陳志嵐
孫耀威的花名叫老孫，但他的顏值卻青春不老，跟女友陳美詩面臨七年之癢，去年傳出兩人秘婚的消息，老孫認為沒必要解釋和澄清，更半真半假戲言自己生仔了！而過去兩年老孫在內地做生意，發現外面的世界很多獅子老虎：「做生意令到我貼番地啲，否則再落去可能做堅離地代表！」
撰文：余燕儀
曾走勻內地和台灣發展的孫耀威，9年前回流香港加盟環球唱片，去年約滿回覆自由身：「當初我真係好想返香港做嘢，好想返自己張床瞓，揸自己架車，放工可以同屋企人食飯，呢9年同公司關係好好，自己想轉換合作可能性，𠵱家做音樂唔能夠滿足，我想做有畫面嘅音樂，我有七個劇本，希望可以自己做導演，到時做歌可能同環球合作。」
實驗賀歲並存
老孫親自寫劇本，由實驗電影到賀歲片都有：「我係一個好乸型嘅人，勁鍾意睇超級文藝片，我係喪喊，寫嘅劇本都係喪文藝，每個人每秒都需要愛情，所以劇本都係情情愛愛。𠵱家度緊資金，希望暑假可以開到，畀啲新意觀眾，諗過簽新人。」
與女友拍拖7年並傳秘婚，老孫說：「冇必要解釋澄清，當我覺得啱數就會做，話唔定我已經生咗仔呢！我唔係刻意去瞞，總之𠵱家未結婚。」早前開餐廳及酒吧蝕千萬，他嘆氣說：「總之老婆本都冇埋，所以唔好再問我幾時結婚，𠵱家仲有其他生意進行緊，我好樂觀，相信自己眼光同頭腦，對人生仲有希望。女友好支持我，我好感動，呢個女仔喺拍檔出賣我時安慰，畀我信心，永遠係我第一個fans，我覺得係好好，都感恩！」
老孫生意上遇到很多挫折，拍檔又因蝕錢離場：「佢拍拍籮柚走咗，將所有責任推曬我身上，我係一個名人身份，好多人用一句：『信唔信我發微博唱衰你？』開始做生意時的確因為係藝人身份有啲著數，但當我生意唔好時，就會被人用作威脅籌碼，試過被員工詐騙告我，以為我會妥協，但我冇畀佢得逞，我覺得冇天理都會有常理。發覺娛樂圈係好好，出面好多三山五嶽，好多獅子老虎，食咗你都唔知乜嘢事，所以生意上我會抽身少少，擺番多啲時間演藝上。」
孫耀威（右二）早前與女友陳美詩（右一）在上海出席酒吧開幕。資料圖片
做藝人好幸福
過去兩年老孫放很多時間在生意上，跟法國設計師合作服裝品牌：「自己好鍾意設計，但做生意過程辛苦，做藝人俾人呵護備至，但做生意試過自己攞二百條員工圍裙，重到阿媽都唔認得，冇理由做生意都要助手，我過唔到自己呢關，所以親力親為，先知做藝人好幸福，自己有少少離地，做生意令到我貼番地啲，否則再落去可能做堅離地代表，哈哈！」
髮型：Sunny Yu of Hair Culture
化妝：Yen Lai
場地：hmv Bar& Restaurant
from:
http://hk.apple.nextmedia ... 160528/19630841
