【銅鑼灣】近年喺內地拍劇賺人仔嘅陳浩民，最近返咗香港陪老婆蔣麗莎同囡囡。大前晚7點幾，佢哋一家三口約咗麥長青（麥包）同幾個朋友喺銅鑼灣農圃食飯，食食吓陳浩民一個人行去SOGO方向，原來佢約咗個阿嬸攞幾罐美國雅培奶粉。
陳浩民大前晚返港，喺銅鑼灣陪老婆同囡囡過年，睇佢越嚟越似一個好老公好爸爸
與妻女留港過年
呢個阿嬸打扮有啲似水貨客，由於強國人嚟香港搶購奶粉，搞到出現奶粉荒，唔知陳浩民使唔使幫襯水貨客先撲到奶粉呢？之後佢返上食肆開餐，親手餵囡囡食嘢，離去時又自己推BB車，成個廿四孝老竇咁款。問係咪香港好難買到奶粉？陳浩民話：「我都唔知呀，喺診所做檢查漏低咗，所以攞番啫。」陳浩民話會留喺香港過年，佢照顧完老婆囡囡上車，就搬BB車上車尾，又幫老婆攞埋粉紅色Chanel手袋，表現得好體貼。麥包同其他朋友就留到11點先走，佢話只係普通食飯。
From:
http://hk.apple.nextmedia ... 130128/18148440
