33歲王菀之歌而優則演，喺《老表，你好嘢！》飾演23歲大學生，佢扮細十年都仲要咁有少女味，都咪話唔勁！
不過，現實中呢位盛女都幾dry吓。上星期，佢嘅音樂家母親馮志麗喺中環大會堂出騷，王菀之同老竇王帆都去咗捧場。散場後，兩父女喺後門等王母走，王菀之唔知係咪dry得耐，媽咪姐見佢同啲精通音樂嘅auntie呀uncle呀鬼咁好傾，傾到王母出嚟等咗成十分鐘都傾唔停，卒之要王母拉住先肯走，認真誇張！傾音樂都傾到咁忘我，又抵佢首《留白》攞金曲金獎嘅！
吹足10分鐘
王菀之同一名auntie傾到指手畫腳停唔到口，搞到王母等到唔耐煩，要一手拉住佢走。
王菀之父母送咗阿女返屋企先，之後兩人去灣仔一間茶餐廳醫肚，兩公婆一人一份三文治，食得好簡單。
送走個長氣女，終於有啖好食！（設計對白）
