周秀娜和髮型師男友陳偉成（Avis）六年情玩完，Avis與C奶𡃁模羅彩玲（Vivian）的床照流出，Vivian昨日否認是小三，她指照片是兩人醉爆時被友人偷拍，兩人沒發生性關係。怒斬情絲的娜姐對舊愛爆床照漠不關心，她酸溜溜說：「我戥佢開心咁快搵到真愛。」
與娜姐男友Avis爆床照的o靚模Vivian，每年夏天均不吝嗇倒瀉C奶拍寫真
周秀娜日前向男友陳偉成攤牌，主動結束六年情，有指分手是Avis搭上𡃁模Vivian，兩人的床照流出，Avis偷食斷正，而娜姐與方力申合作內地劇，有傳獲小方力追，惹來他的女友鄧麗欣向友人哭訴。失戀娜姐寄情工作療情傷，Avis則繼續玩失蹤。
「好傷心嘅階段過咗」
娜姐昨日收拾心情到灣仔錄影有線周美鳳節目，娜姐有看到Vivian和Avis床照的報道，她說：「有睇過，冇乜感覺，𠵱家對我嚟講，我哋已分開，對前男友嘅感情生活我冇興趣知。Avis同佢嘅感情生活，唔想由我嘅立場幫佢回應，我好傷心嘅階段過咗。」以時間來計，Vivian的出現當時娜姐與Avis未分手，她說：「時間對我嚟講從來唔係一個point。」娜姐是否預料Avis花弗？她說：「一段過咗去嘅感情，過咗去嘅人唔會有乜嘢，如果係真，我戥佢開心咁快搵到真愛。」娜姐自爆跟Avis沒聯絡幾個月。
周秀娜昨不願回應舊愛Avis的新戀情，只酸溜溜祝福他
Vivian聲稱與Avis當日醉爆，才在梳化睡着被偷拍
Vivian洩床照令經理人向展邦震怒，他昨晚即約同Vivian在尖沙嘴訓話，拍枱力斥她的行為影響公司形象，她即眼紅紅，向展邦表示要處分她，令她非常擔心。
【今日我至紅】o靚模Vivian噚日因床照事件被經理人訓話，佢即刻眼紅紅抹淚
Vivian：嗰晚飲到醉晒
Vivian說：「要冧番佢，件事好突然，自己都呆咗。我哋唔係拍拖，嗰張唔係床照，因為末日派對同班朋友去蘭桂坊飲嘢，之後上咗Avis屋企，佢嗰日唔開心，可能同女友鬧交，佢話娜姐忙，成日唔喺香港，佢哋相處唔開心，嗰晚佢飲到醉晒，我又飲咗好多，之後我哋喺梳化瞓着，朋友就影咗相放上facebook，tag咗我個名。」可有跟Avis發生性關係？Vivian說：「梗係冇。」Avis可有展開追求？Vivian說：「唔知，冇啩，佢對朋友好好，我哋未試過單獨約會。」Vivian指情侶眼鏡和帽只是巧合，對於娜姐指不認識她，Vivian自嘲：「我啱啱出道冇耐，一定冇佢咁忙。」
From:
http://hk.apple.nextmedia.com/entertainment/art/20130123/18143367
