在信和開業十多年的新哥指，賣寫真純粹因為市場需要。
如果你是三十多四十歲甚至更年長，你一定蒲過漫畫店，以前未有互聯網，漫畫店有租有賣，最新漫畫消息就是靠書內或書背廣告，跟着出版日期，走去漫畫店買最新一期漫畫。現在，漫畫小店逐間結業，旺角信和亦由全盛時期幾十間漫畫店變成幾間。其中上三樓樓梯的「至Goal Club」，捱到今時今日，老闆張瑞新（新哥）表示，原來周秀娜都有出一分力。
小時候家住土瓜灣，天光道附近的德信商場有漫畫店，斜對面地舖又有租書店，另一邊九龍城龍珠商場也有，現在想找一間也很難。沙田「龍城」、灣仔188「天朗」等等「地區代表」亦於早年結業，今個月香港仔的「海洋」也退下來。再過多幾年，香港還會有漫畫店嗎？
漫畫每本賺10% 交租都唔夠
在信和開業十多年的「至Goal Club」，當年食正港漫兵器潮而起，之後近年生意每況愈下。「無論日漫定港漫，都一直向下，數字不斷跌。近日最好賣嘅日本漫畫係《龍珠超》，據說一期可以有約一萬銷量。但巔峯時期嘅《龍珠》，一期可以賣二十萬本！你可以想像個差別幾誇張。」這是大趨勢，「紙媒行業萎縮，唔只漫畫，全部書都跌嘅。」
書賣得差是原因之一，不過令經營漫畫店更困難的原因，是毛利少。「業界本身制度都令漫畫店好難做，有啲嘢係改變唔到，出版社唔會突然咁好死，五折、六折批畀你書屋，𠵱家每本書嘅毛利只有20%，加上我哋要保持競爭力，又會減到約九折賣書，所以每本書只賺到約10%，點交租？香港報攤由以前最多二千幾檔，變成𠵱家幾百檔，報攤唔使交租都生存唔到，我哋漫畫店點搞？條數就係咁樣計。」其他同場書店相對比較容易，「其他好多都係出版社自己開嘅，咁佢哋啲書會快啲，成本又少咗，係好做好多。但你問我香港會唔會冇晒漫畫店？我覺得唔會，因為出版社都要有漫畫店散貨，除非冇書出啦。」
就是周秀娜這本寫真《Kissy Chrissie Saipan》，令「至Goal Club」開始賣寫真。
說起港漫，新哥說其實很多畫功也很好，只是故事劇本比起日本漫畫有點輸蝕。
《龍珠超》是近期最好賣的日漫。如果說一直保持好銷量的，則是日本最好賣的《One Piece》。
樂瞳寫真賣斷市
新哥慨嘆了一句：「可能隔多一年半年，呢個書架都唔見埋，轉賣其他嘢喇，我都唔知。」其實可以經營到今時今日，也不只是靠滿腔熱誠。「都現實嘅，如果我每個月都蝕錢嘅時候，我會捱唔住，唔可能只講情意結。係有啲唔甘心，自己唔係做得比人差，所以都想做落去，唔想坐以待斃，否則我唔會試賣其他咁多書種。」當中包寫真。
「其實唔係刻意賣寫真，純粹係市場引導我哋。我記得當年有漫畫迷問我哋有冇周秀娜本寫真賣，喂我哋賣漫畫喎，你都嚟問？而且之後每日有十幾二十個人問，於是我就試吓搵嚟賣。」說的那本周秀娜寫真，就是2009年的《Kissy Chrissie Saipan》。「之後返咗貨，佢哋又問有冇其他？有冇Angelababy？我又搵貨返嚟賣囉，之後就儲咗一群買寫真嘅客。」看到漫畫書店這個寫真集角落，現在不只香港，連台灣寫真也有，那近期最好賣又係邊位？「睇潮流，新聞越多越好賣。近期最好賣，樂瞳啦，到𠵱家都日日有人問，不過已經冇貨，出版社都話賣斷晒。」三十一歲樂瞳寫真賣斷貨！估不到吧？不過我想老實講句，其實我覺得影得幾靚。
以往在香港要找漫畫店「梗有一間喺左近」，現在想找一間也很難。
新哥說讀者在網上睇到好睇嘅漫畫，會願意畀錢買實體書，所以高質素嘅漫畫係十分重要。
在新哥的書店，最好賣的港漫是《山海》，每期也有草稿特別版，一本看一本儲。
另類寫真客 不要露點不要硬皮
不要心邪，不露點是真的不露三點，不硬皮是真的不要硬皮包裝。「我話市場會引導我哋，就係因為有啲客源你係估唔到嘅。試過有一次有位中年女性嚟買寫真集，我好奇點解佢會買寫真啦，傾開先知原來佢係買俾個仔，佢個仔因為犯咗事入咗獄，而本寫真就係買畀佢。咁我又好奇喇，寫真集可以帶入去咩？原來佢話只要唔露點，而且唔係硬皮包裝就可以，因為怕硬皮包裝有攻擊性啩。」
原來寫真集還有這個市場，那我忠告一下，各位準備拍寫真的囡囡，記得不要出硬皮包裝；另外各位年輕、血氣方剛的男性，千萬不要行差踏錯，否則你就只能看樂瞳寫真了。
訪問中，新哥常說自己對漫畫已沒有愛，又說不是因為情意結，其實，如果沒有這兩種感覺，怎會千方百計捱到現在？說完寫真，說回漫畫，其實還有出路的，新哥愛之深感嘆：「港漫真係唔太爭氣，𠵱家真係得龍哥（邱福龍）、和仔（鄭健和）有心去做。不過又講番轉頭，我呢度就係佢哋嘅《山海》、《西遊》最好賣，但據我所知以全港計，係《新著龍虎門》賣得最好。」《龍虎門》？每期在網上也很多人鬧！「慣性收視嘛。」
說到情意結，這本《東京愛的故事After25 Years》近期都好賣，就是因為情意結，可以見番完治和梨香嘛！
原來這些完全版，大陸需求很大，所以台灣、香港現在也出版了很多中文完全版漫畫。
新哥以港漫起家，現在有很多港漫fans也會到這裏買書，因為可以逐本揀，揀一本最靚的，報攤不會容許。
開餐廳好過開漫畫店
上網睇漫畫係罪魁禍首？答案出人意表，「未必。」漫畫質素高低，對漫畫店的影響，絕對比你想像中更大更深！「我講一個例子，大約七、八年前，嗰時有讀者喺網上睇漫畫，係《小魔神》，之後就嚟搵我買一套二手漫畫，全套買。佢同我講佢全部漫畫都喺網上睇嘅，但覺得好好睇，所以想買嚟儲。日漫都有，《一拳超人》最明顯，未出之前已經一直有人問，我話都未出書，你哋點知呢本嘢？佢哋話喺網上睇過好好睇，要買單行本。網上可以令佢哋接觸好多唔同漫畫，當佢哋遇到好睇嘅，係會願意畀錢買實體書。」所以說到尾，「我又唔係悲觀到極點，以前我覺得淨係得我哋呢一輩老餅先對實體書有情意結，但後來我發現有一班年輕人，二十幾歲，都會想買實體書。所以講到尾，有高質素嘅漫畫係最重要嘅。」
「做到冇得做啦，其實我同同事都傾過，開間餐廳好過做一間書店啦，因為有人嚟食嘢，話個餐蛋麵唔熟喎，我哋可以煮過，但你投訴本書唔好睇，我哋真係冇辦法。好似早兩日有人投訴，話本書入面有一頁連字都睇唔清，其實只要嚴謹啲，出版前睇吓藍紙，都唔會咁，就係有啲人得過且過。所以寧願做一間食店，我控制到質素，令客人滿意。」
「不過，我始終會想做一間以漫畫為主題嘅食店。我相信遲早都會走到呢一步。」
漫畫書店的寫真集角落，還有賣大量的台灣女星寫真集，雖然不露點，但仍是有市場。
正所謂「英雄所見樂瞳」，近期最好賣的寫真，就是她那本。新哥說這張海報曾經被偷，這已經是第二張。
至Goal Club
旺角彌敦道信和中心商場3樓231舖
記者：陳孝義
攝影：徐振國、鄭明川
編輯：彭錦明
